މާލޭގެ ދެކުނު ފަރާތު ހުންނަ މާލޭ ޖަލު ހުޅުމާލެއަށް ބަދަލުކުރަން ނިންމާފައިވާ ކަމަށް ހޯމް މިނިސްޓަރ އިމުރާން އަބްދުﷲ ވިދާޅުވެއްޖެއެވެ.
ނޫސްވެރިންނަށް މައުލޫމާތު ދެއްވަމުން ހޯމް މިނިސްޓަރ ވިދާޅުވީ، މާލޭ ޖަލު ހުޅުމާލެ އަށް ބަދަލު ކުރަން ނިންމީ ރާއްޖޭގެ ޖަލުތަކަށް ދިމާވެފައިވާ ޖާގައިގެ މައްސަލަތައް ހައްލުކުރުމަށް ސަރުކާރުން ކުރާ މަސައްކަތްތަކުގެ ތެރެއިން އަޅާ ފިޔަވަޅެއްކަމަށެވެ. އެހެންކަމުން މާލޭގައި މިވަގުތު ހުރި ޖަލު ހުޅުމާލެ އަށް ބަދަލު ކުރުމުން ތަނުގެ ޖާގަ ވަރަށް ތަނަވަސްވެގެން ދާނެ ކަމަށް މިނިސްޓަރ ވިދާޅުވިއެވެ.
އަދި ރައީސުލްޖުމުހޫރިއްޔާ އިބްރާހިމް މުހައްމަދު ސާލިހު ވެރިކަމާއި 2018 ވަނަ އަހަރު ހަވާލުވެވަޑައިގެންނެވި އިރު ރާއްޖޭގެ ޖަލުތަކުގެ ހާލަތު ވަރަށް ގޯސް ކަމަށާއި މިވީ ތިން އަހަރުގެ ތެރޭގައިވެސް ޖަލުތަކުގެ ހާލަތު ރަނގަޅުކުރުމަށް ގިނަ މަސައްކަތްތަކެއް ކުރެވިއްޖެ ކަމަށް އިމްރާން ވިދާޅުވިއެވެ. އެގޮތުން ޖާގައިގެ ދަތިކަމަކީ މިއަދާ ހަމައަށްވެސް ޖަލުތަކުގައި ހައްލު ނުކުރެވި އޮތް ބޮޑު މައްސަލައަކަށް ވާއިރު މިހާރުވެސް މިމައްސަލަ ހައްލު ކުރުމަށް ރޭވިގެން ގިނަ މަސައްކަތްތަކެއް ދަނީ ކުރެވެމުން ކަމަށް މިނިސްޓަރ އިމުރާނު ވިދާޅުވިއެވެ.
ކުޑަކުދިންގެ ޖަލާ ގުޅޭގޮތުން ވާހަކަފުޅުދައްކަވަމުން މިނިސްޓަރު އިމްރާން ވިދާޅުވީ ކުށްކުރާ ކުޑަކުދިން ކުށުގެ ވެށިން ދުރުކުރުވުމަށް ސަރުކަރުން މުހިންމު ގިނަ މަސައްކަތްތަކެއް ފަށާފައިވާކަމަށެވެ. އެގޮތުން ކުށްކުރާ ކުދިންގެ މައްސަލަތައް ބަލައި ފިޔަވަޅު އެޅުމުގައި ސަރުކާރުން ކުރާ މަސައްކަތްތަކުގެ އަމާޒަކީ ކުށުގެ ވެށިން ކުދިން ދުރުކުރުވުންކަން މިނިސްޓަރ ފާހަގަކުރެއްވިއެވެ. އެކިއެކި ކުށްކުށުގައި ޙުމްތަންފީޒުކުރަންޖެހޭ ކުޑަކުދިން ބައިތިއްބަން ހަދާ ޖަލުގެ މަސައްކަތް މިއަހަރު ނިމުމުގެ ކުރިން ނިމޭނެ ކަމަށް ވެސް ހޯމް މިނިސްޓަރ ވިދާޅުވިއެވެ.
