ސިނަމާލެ ބްރިޖުގެ ބައެއް ލޭންތައް މިރެއިން ފެށިގެން ބަންދު ކުރަން ނިންމާފައިވާ ކަމަށް ޓްރެފިކް ފުލުހުން ހާމަކޮށްފިއެވެ.
އެގޮތުން ފުލުހުން ކުރި ޓުވީޓެއްގައި ބުނީ ބުރިޖުގެ ލޭންތައް ބަންދުކުރެވޭ ވަގުތުތަކުގައިވެސް، ހުޅުވާލާފައިވާ ލޭނުން ދެކޮޅަށް ފުލުހުންގެ އިރުޝާދާއި އެއްގޮތަށް ދަތުރުކުރެވޭނެ އިންތިޒާމު ހަމަޖެހިފައިވާނެ ކަމަށެވެ.
އަދި މިރޭ 23:30 ން ފެށިގެން މާދަމާ ފަތިހު 5:30 އަށް ސިނަމާލެ ބުރިޖުގެ ހުޅުމާލެއިން މާލެއަށް ދަތުރުކުރާ ލޭން ބަންދުވާނެ ކަމަށާއި 22 ނޮވެމްބަރ ދުވަހުގެ 23:20 ން 23 ނޮވެމްބަރ ވަނަ ދުވަހުގެ ފަތިހު 5:30 އަށް މާލެއިން ހުޅުމާލެއަށް ދަތުރުކުރާ ލޭން ބަންދުވާނެ ކަމަށެވެ.
މި ލޭންތައް ބަންދު ކުރަނީ ކޮން މަސައްކަތެއް ކުރުމަށް ކަމެއް ފުލުހުން ހާމަކޮށްފައެއް ނުވެއެވެ. ސިނަމާލެ ބްރިޖް ހުޅުވި ފަހުން އެކި މަސައްކަތްތައް ކުރުމަށްޓަކައި ލޭންގެ އެކި ހިސާބުތައް ބަންދު ކުރެއެވެ.
