2023 ގެ ނިޔަލަށް ފައިސާ ޗާޕުކުރުމުގެ މުއްދަތު އިތުރުކުރުމަށް ރައްޔިތުންގެ މަޖިލީހުން މިއަދު ފާސްކޮށްފިއެވެ.
ފިނޭންސް މިނިސްޓަރު އިބްރާހިމް އަމީރު ވަނީ މީގެ ކުރިންވެސް ދެ ފަހަރެއްގެ މަތިން މި މުއްދަތު އިތުރުކޮށްދިނުމަށް އެދި މަޖިލީހަށް ސިޓީ ފޮނުއްވާފައެވެ. މި ހުއްދަ ދިނުމުގެ ގޮތުން ރައްޔިތުންގެ މަޖިލީހުން ފިނޭންސް މިނިސްޓަރު ހުށަހަޅުއްވާފައިވާ ގޮތަށް ދައުލަތުގެ ހަރަދަށް ޒިންމާވުމުގެ ގާނޫނުގެ ވަކި މާއްދާތަކަކަށް އަމަލުކުރުން ހުއްޓާލަން ފާސް ކުރަން ޖެހެއެވެ.
މިއަދުގެ ޖަލްސާގައި ފައިސާ ޗާޕު ކުރުމުގެ މުއްދަތު އިތުރު ކުރުމަށް ނެގި ވޯޓުގައި، 2023 ވަނަ އަހަރުގެ ނިޔަލަށް އެ މުއްދަތު އިތުރު ކުރުމަށް ފާސްވީ 42 މެމްބަރުންގެ ވޯޓުންނެވެ. މި މުއްދަތު އިތުރު ކުރުމަށް ނުފެންނަ ކަމަށް ވޯޓު ދީފައިވަނީ ދެ މެމްބަރުންނެވެ.
މިއީ ދައުލަތުގެ ޚަރަދަށް ޒިންމާވުމުގެ ގާނޫނުގެ 32 ވަނަ މާއްދާގެ (ހ)، (ރ) އަދި (ބ) ގައި ބަޔާން ކޮށްފައިވާ އުސޫލުތަކާއި ހަމަތަކުން އިސްތިސްނާ ކުރަން ހަމަ އެ ގާނޫނުން މަޖިލީހަށް ދީފައިވާ ބާރެކެވެ.
ކޮވިޑާ ގުޅިގެން ރާއްޖޭގެ އިގްތިސޯދަށް ދިމާވި މައްސަލަތަކާ ގުޅިގެން 2020 ވަނަ އަހަރު އެކަމަށް އެއް އަހަރު ދުވަހުގެ ހުއްދަ ދޭން މަޖިލީހުން ފާސްކުރިއެވެ.
މިއަހަރުގެ އޭޕްރީލް މަހުން ފެށިގެން އެ މުއްދަތު އިތުރު އެއްއަހަރު ދުވަހަށް މަޖިލީހުން އިތުރު ކޮށްދިނެވެ. 20022 ވަނަ އަހަރުގެ އޭޕްރީލް މަހުގެ 26 ވަނަ ދުވަހުން ފެށިގެން މި މުއްދަތު އިތުރު އެއް އަހަރު ދުވަހަށް އިތުރު ކޮށްދެއްވުމަށް އެދިވަޑައިގެން ފިނޭންސް މިނިސްޓަރު އިބްރާހިމް އަމީރު މަޖިލީހަށް މިއަދު ފޮނުއްވި ސިޓީގައި ވިދާޅުވެފައިވަނީ ވޭތުވެދިޔަ 18 މަސްދުވަހުގެ ތެރޭގައި މި ހުއްދައިގެ ސަބަބުން ދައުލަތުގެ ހަރަދުތައް ހަމަޖައްސައި، ހިދުމަތްތަކަށް ބުރޫ އެރިޔަ ނުދީ ދައުލަތް ހިންގުމުގެ ފުރުސަތު ލިބިގެން ދިޔަ ކަމަަށެވެ.
