ބްރެޒިލުން ރާއްޖެ އައި މީހެއްގެ އަތުން 94 މިލިއަން ރުފިޔާގެ މަސްތުވާތަކެތި އަތުލާގެންފިއެވެ.
ކަސްޓަމްސް އިން ބުނީ މިމައްސަލައިގަ އަތުލައިގަނެވުނު މަސްތުވާތަކެތީގެ އަގު 94 މިލިއަން ދިވެހި ރުފިޔާއަށް އަރާނެ ކަމަށާއި މިމައްސަލައިގަ ޝާމިލްވާ މީހާ އާއި އަތުލައިގަނެވުނު މަސްތުވާތަކެތި މިހާރު ވަނީ މޯލްޑިވްސް ޕޮލިސް ސާރވިސް އާ ހަވާލު ކޮށްފައި ކަމަށެވެ.
ކަސްޓަމްއިން ބުނެފައިވަނީ ވައިގެ މަގުން ބްރެޒިލް އިން ރާއްޖެ އައި އެގައުމުގެ ރައްޔިތެއްގެ އަތުން މަސްތުވާތަކެތި އަތުލައިގަންފައިވާ ކަމަށެވެ. އެގޮތުން މިމަހުގެ 2 ވަނަ ދުވަހު ރާއްޖެ އައި އުމުރުން 28 އަހަރުގެ ބުރެޒިލް ފިރިހެނެއް، އޭނާއާ މެދު ޝައްކު ކުރެވިގެން އޭނާގެ ލަގެޖު ކަސްޓަމްސްއިން ބަލާ ފާސްކުރި އިރު، އޭނާގެ ލަގެޖުގެ ތެރެއިން މަސްތުވާތަކެތި ކަމަށް ޝައްކު ކުރެވޭ ތަކެތި ވަނީ ފެނިފައި ކަމަށެވެ.
އަދި ފުރަތަމަ މަރުހަލާގައި މި ތަކެތި ކަސްޓަމްސް އިން ޓެސްޓް ކުރި އިރު މަސްތުވާތަކެތީގެ ބާވަތެއް ކަމުގައިވާ ކޮކެއިންއަށް ވަނީ ޕޮޒިޓިވްވެފައި ކަމަށްވެސް ކަސްޓަމްސްއިން ހާމަކުރެއެވެ. މިމީހާ އަތުން އަތުލައިގަނެވުނު މަސްތުވާތަކެތީގެ ޖުމުލަ ބަރުދަނުގައި 18.857 ކިލޯގުރާމް ހުރި ކަމަށްވެސް ކަސްޓަމްސް އިން ވަނީ ބުނެފައެވެ.
