ކުރީގެ ރައީސް އަބްދުﷲ ޔާމީނަށް ހުކުމް ކުރުމަށް، އަންގާރަ ދުވަހަށް ސުޕްރީމް ކޯޓުން ތާވަލްކޮށްފިއެވެ.
މިއީ ރައީސް ޔާމީންގެ މައްޗަށް އިއްވާފައިވާ ޖަލު ހުކުމް އެމަނިކުފާނުގެ ފަރާތްޕުޅުން ސުޕްރީމް ކޯޓުގައި އިސްތިއުނާފުކުރެއްވި މައްސަލައިގެ ހުކުމެވެ. ހުކުމް ކުރުމުގެ ޝަރީއަތް ބާއްވަނީ މިމަހުގެ 30 ވާ އަންގާރަ ދުވަހު ހެނދުނު ނުވައެއް ޖަހާއިރު އެވެ. މިމަހުގެ 30 ވަނަ ދުވަހު ހުކުމް އިއްވާނެކަން މިހާރު ރައީސް ޔާމީންގެ ވަކީލުންނަށްވެސް ވަނީ އަންގާފައެވެ.
އަންގާރަ ދުވަހު ސުޕްރީމް ކޯޓުން އެ ޔާމީންގެ މައްޗަށް ކުރާ ދައުވާ ދަމަހައްޓައިފިނަމަ 2023 ވަނަ އަހަރު އޮންނަ ރިޔާސީ އިންތިހާބުގައި ވާދަކުރުމުގެ ފުރުސަތު މުޅިންހެން ރައީސް ޔާމީން އަށް ގެއްލިގެންދާނެއެވެ.
ކުރީގެ ރައީސް ޔާމީން އާއި ވ.ފެލިދޫ ހަނދުވަރީގެ ޔޫސުފް ނަޢީމް، މިނިސްޓްރީ އޮފް ޓްއަރިޒަމް އާއި މޯލްޑިވްސް މާރކެޓިންގ އެންޑް ޕަބްލިކް ރިލޭޝަން ކޯޕަރޭޝަން މެދުވެރިކޮށް ޓުއަރިސްޓް ރިޒޯޓް ތަރައްގީ ކުރުމަށްޓަކައި ވ.އާރަށް ކުއްޔަށް ދޫކުރުމުގެ މުއާމަލާތުގެ ތެރެއިން އޭރުގެ ރައީސުލްޖުމްހޫރިއްޔާ މަގާމުގެ ނުފޫޒު ބޭނުންކޮށްގެން ރިޝްވަތުގެ ގޮތުގައި އެއްމިލިއަން ޔޫއެސް ޑޮލަރ ނަގައި ލޯންޑަރ ކޮށްފައިވާ ކަމަށް ތުޙުމަތުކުރެވޭ މައްސަލައިގައި ދަޢުވާތައް ކުރުމަށް އިއްޔެ ވަނީ ކުރިމިނަލް ކޯޓަށް ހުށަހަޅާފައެވެ.
