ކޮވިޑް19ގެ އައު ވޭރިއަންޓް އޮމިކްރޮން އާއެކު ހަތް ގައުމަކުން ރާއްޖެއަށް މީހުން އެތެރެވުން މަނާކޮށްފިއެވެ.
މި ގައުމުތަކުގެ ތެރޭގައި ހިމެނެނީ މި ވޭރިއެންޓް އެންމެ ފުރަތަމަ ފެނިފައިވާ ދެކުނު އެފްރިކާ، ނެމީބިއާ، މޮޒަންބީކް، ލެސޯތޯ، ބޮޓްސްވާނާ، ޒިންބާބްވޭ އަދި އެސްވަޓިނީއެވެ. ހެލްތް ޕްރޮޓެކްޝަން އެޖެންސީން ނެރެފައިވާ އިއުލާނެއްގައި ބުނެފައިވަނީ ރައްކާތެރިކަމުގެ ފިޔަވަޅެއްގެ ގޮތުން މިރޭ މެންދަމު ބާރަ އިން ފެށިގެން ވަކިގޮތެއް އަންގަންދެން ދިވެހިރާއްޖެއަށް އައުމުގެ 14 ދުވަސް ކުރިން މި ގައުމުތަކުގައި އުޅެފައިވާ މީހުންނާއި 12 ގަޑިއިރަށްވުރެ ގިނަ އިރު ޓްރާންސިޓްވެފައި އަންނަ މީހުން ވެސް ރާއްޖެ އެތެރެވުން މަނާ ކަމަށެވެ.
އަދި ދިވެހިރާއްޖެއަށް އައުމުގެ 14 ދުވަސް ކުރިން ސައުތު އެފުރިކާ، ނެމީބިއާ، މޮޒަންބީކް، ލެސޯތޯ، ބޮޓްސްވާނާ، ޒިންބާބްވޭ އަދި އެސްވަޓިނީގައި އުޅެފައިވާ ބާރަ ގަޑި އިރަށްވުރެ ގިނަ އިރު ޓްރާންސިޓްވެފައި އަންނަ މީހުން ހިމެނޭ ގޮތަށް ރާއްޖެ އަންނަ ދިވެހިންނާއި ވާރކްވިސާގައި އަންނަ މީހުން ރާއްޖެ އައުމަށްފަހު ސާދަ ދުވަހުގެ މުއްދަތަށް ކަރަންޓީނުވުމާއެކު، މިފަދަ ފަރާތްތައް ކަރަންޓީނުން ރިލީސް ކުރެވޭނީ ސާދަ ދުވަސް ހަމަވުމުން ކޮވިޑް19 އަށް ޓެސްޓް ހަދައި ނަތީޖާ ނެގެޓިވް ވުމުން ކަމަށް ބުނެފައިވެއެވެ.
މީގެ އިތުރުން މި އިއުލާނަށް އަމަލު ކުރަން ފަށާއިރު މި ގައުމުތަކުން ދިވެހިރާއްޖެއަށް ދަތުރުފަށާފައިވާ ފަރާތްތަކުންނާއި ވޭތުވެދިޔަ ސާދަ ދުވަސް ތެރޭގައި މި ގައުމުތަކުން ދިވެހިރާއްޖެއަށް އެތެރެވެފައިވާ މީހުން މިވަގުތު ޕީސީއާރު ޓެސްޓެއް ހެދުން، ސާދަ ދުވަސް ނުވަތަ އެއަށްވުރެ ދިގު މުއްދަތަކަށް ރާއްޖޭގައި ހޭދަކުރާ މީހުން 14 ދުވަސް ފުރިހަމަވުމުން އިތުރު ޕީސީއާރު ޓެސްޓެއް ހެދުން، ރާއްޖޭގައި 14 ދުވަހަށްވުރެ ކުރު މުއްދަތެއް ހޭދަކުރާ ފަރާތްތަކުން ރާއްޖެއިން ފުރުމުގެ ކުރިން އިތުރު ޕީސީއާރު ޓެސްޓެއް ހަދަން ޖެހޭނެ ކަމަށް ބުނެފައިވެއެވެ.
