ކޮވިޑް19ގެ ވައްތަރުތައް ދެނެގަތުމަށް، ހަފުތާއަކު 50 ސާމްޕަލް ރާއްޖެއިން ބޭރަށް މިހާރުވެސް ފޮނުވަމުންދާ ކަމަށް އެޗްޕީއޭއިން ހާމަކޮށްފިއެވެ.
ނޫސްވެރިންނަށް މައުލޫމާތުދެއްވަމުން ޑރ ނަޒުލާ ވިދާޅުވީ، އޮގަސްޓް މަހުގެ 13 ވަނަ ދުވަހުން ފެށިގެން ކޮންމެ ހަފުތާއަކު 50 ސާމްޕަލް އިންޑިއާއަށް ފޮނުވާއިރު މިއަދާ ހަމައަށް 800 އަށްވުރެ ގިނަ ސާމަޕަލް ފޮނުވާ ޓެސްޓް ކުރެވިފައިވާ ކަމަށެވެ.
އަދި މިހާރު އަލަށް ފެނިގެން އުޅޭ އޮމިކްރޮން ވޭރިއަންޓާ ގުޅިގެންވެސް ބަލަން ޖެހޭ ގިނަ ކަންކަން ރާއްޖެ އިން ބަލަމުން އަންނަ ކަމަށެވެ. އެގޮތުން މިވަގުތު ކުރެވޭނެ ހަމައެކަނި ކަމަކީ މި އައު ވޭރިއަންޓާ ގުޅިގެން ސީކުއެންސިން އަށް ސާމްޕަލްތައް ބޭރަށް ފޮނުވުން ކަމަށް ނަޒުލާ ވިދާޅުވިއެވެ.
އަދި އައު ވޭރިއަންޓްތައް އައުން ނުހުއްޓުވޭނެ ކަމަށާއި ނަމަވެސް އެކި ޕީކްތައް އައުން ހުއްޓުވޭނީ އެންމެ ރައްކާތެރިކަން ހިޔާރުކޮށްގެން ކަމަށް ވިދާޅުވިއެވެ. އޮމިކްރޮން ވޭރިއަންޓް އެކަކުގެ ގައިން އަނެކަކުގެ ގަޔަށް ނުވަތަ މުޖުތަމައުގައި ފެތުރޭ މިންވަރު އަދި ދެނެގަނެވިފައި ނުވާ ކަމަށް ޑރ ނަޒުލާ ވިދާޅުވިއެވެ.
