ރައީސުލްޖުމުހޫރިއްޔާ އިބްރާޙިމް މުހައްމަދު ސާލިހުގެ ސަރުކާރުގެ 100 ދުވަހުގެ ވައުދުތަކުގެ ތެރެއިން ޓްރާންސްޕޯޓް މިނިސްޓްރީއަށް މިހާރު ނުފުއްދި އޮތް ހަމަ އެކަނި ވައުދަކީ މިނީބަސް ތައާރަފްކުރުން ކަމަށް މިނިސްޓަރ އާއިޝަތު ނަހުލާ ވިދާޅުވެއްޖެއެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި ހެންވޭރު ހުޅަނގު ދާއިރާގެ އެމްޑީޕީ މެންބަރު އަދި އެ ޕާޓީގެ ޗެއާޕާސަން ހަސަން ލަތީފް ކުރެއްވި ސުވާލަކަށް ޖަވާބު ދެއްވަމުން މިނިސްޓަރ ނަހުލާ ވިދާޅުވީ، ޓްރާންސްޕޯޓް މިނިސްޓްރީއަށް 100 ދުވަހުގެ ތެރޭގައި ފުއްދުމަށް ގިނަ ވައުދުތަކެއް ހުރި ކަމަށާއި މިއަދާ ހަމައަށް ނުފުއްދި އޮތް ހަމައެކަނި ވައުދަކީ މާލެ ސާރަހަށްދަށް މިނީބަސް ތައާރަފުކުރުމަށް ވީ ވައުދު ކަމަށެވެ.
މިނީބަސް ތައާރަފު ކުރުމުގެ މަސައްކަތް އެތައް ފަހަރެއްގެ މަތިން ކުރެވިއްޖެ ކަމަށާއި އެހެން ނަމަވެސް އަދިވެސް އެކަން ވާގޮތެއް ނުވާ ކަމަށް ނަހުލާ ވިދާޅުވިއެވެ. މިނިސްޓަރ ނަހުލާ ވިދާޅުވީ އެކަން ނުވެގެން އުޅެނީ އެކަށީގެންވާ ބަޖެޓެއް ނުލިބޭތީ ކަމަށާއި ލަސްވަމުން ދަނީވެސް އެހެންވެގެން ކަމަށެވެ.
މީގެ ކުރިން އެތައް ފަހަރެއްގެ މަތިން ޓްރާންސްޕޯޓް މިނިސްޓަރ ނަހުލާ ވަނީ މިނީބަސް ތައާރަފު ކުރުމަށް ތާރީހުތަކެއް ދީފައެވެ. މިއަދު ނަހުލާ ވިދާޅުވީ، ވަޒީރެއް ގޮތުން މަގާމހު ހަވާލު ކުރިއަށް މަސައްކަތް ކޮށް ވައުދުތައް ފުއްދޭނީ ވެސް އެކަން ކުރަން ބަޖެޓް ލިބުމުން ކަމަށެވެ.
