މި ދެ އަހަރު ރާއްޖޭގެ ތަރައްގީގެ ތާރީހު ހުއްޓި އިގްތިސާދު ވަނީ ފުންއަނދަވަޅަކަށް ވެއްޓިފައި ކަމަށް ނައިފަރު ދާއިރާގެ މެމްބަރު އަހުމަދު ޝިޔާމް ވިދާޅުވެއްޖެއެވެ.
ޝިޔާމް ކުރެއްވި ޓުވީޓެއްގައި ވިދާޅުވީ، ނާއިންސާފުވެރި ހުކުމަކުން ރައީސް ޔާމީން ޖަލުގައި ހުންނަވާތާ 2 އަހަރުވީއިރު ރައްޔިތުންނަށް މި 2 އަހަރުވެގެން މިދިޔައީ ރާއްޖޭގެ ތަރައްގީގެ ތާރީހު ހުއްޓި އިގްތިސާދު ފުންއަނދަވަޅަކަށް ވެއްޓި ގައުމު ބަނގުރޫޓުވެ ރައްޔިތުން ނިކަމެތިވެގެންދިޔަ 2 އަހަރަށް ކަމަށެވެ.
ކުރީގެ ރައީސް ޔާމީންގެ މައްޗަށް ހުކުމް ކޮށްފައިވަނީ 2019 ވަނަ އަހަރުގެ ނޮވެންބަރު މަހުގެ 28 ވަނަ ދުވަހުއެވެ.
ޝިޔާމް ވިދާޅުވީ، ހަމަޔާ އިންސާފުގެ މައްޗަށް އަނިޔާވެެރިކަމާ ބޭއިންސާފު ގަދަވެ ދިވެހި ޖުމްހޫރިއްޔާގެ ގާނޫން އަސާސީ ނަގަހައްޓާ ދަމަހައްޓަންތިބި ޒިންމާދާރު މުއައްސަސާތައް ނުކުޅެދި ޑިމޮކްރަސީއަށް ރައްޔިތުންކުރި އުންމީދުތައް ވެއްޔާމޮޑެވި މުޅި ނިޒާމާދޭތެރޭ ރައްޔިތުންގެ އޮތް ހަނި އިތުބާރުވެސް ގެއްލިގެންދިޔަ ބަނަ ދުވަހެއް ކަމަށެވެ. ރައީސް ޔާމީންގެ މައްސަލައަކީ ސަރުކާރުން ސިޔާސީ މަންފާއަށް ފެބްރިކޭޓުކުރި މައްސަލައެއް ކަމަށާއި ތަހުގީގުން ފެށިގެން އެންމެމަތީ ކޯޓާހިސާބަށް އެމައްސަލަ ދަތުރުކުރިއިރު ހާމަކަންބޮޑުކޮށް ރައްޔިތުންނަށް ފެނި ޔަގީންވެގެން ދިޔައީ ސަރުކާރުގެ ނުފޫޒު ހުރިހާ މަރުޙަލާއެއްގައި މުޅި މައްސަލަޔަށް އޮތްމިންވަރު ކަމަށް ޝިޔާމް ވިދާޅުވިއެވެ.
އަދި ފެނި ހާމަވީ ރައީސް ޔާމީންގެ ސާބިތުކަމާ އެމަނިކުފާނުގެ މައުސޫމްކަން ކަމަށާއި ދިވެހި ޤައުމުގެ ކަންކަން ނިންމުމުގައި ދިވެހިންނަށް ބަސް ނުބުނެވި ދިވެހިރާއްޖޭގެ މިނިވަންކަން ގެއްލި އަޅުވެތިކަން ވެެރިވި 2 އަހަރަށް ކަމަށް ޝިޔާމް ވިދާޅުވިއެވެ.
