މިނިސްޓްރީ އޮފް ޓްރާންސްޕޯޓްގެ ދަށުން ހިންގާ ޓްރާންސްޕޯޓް އޮތޯރިޓީ އުވާލަން މަޖިލީހުން މިއަދު ފާސްކޮށްފިއެވެ.
ރައްޔިތުންގެ މަޖިލީހުން ކުރިއަށް ގެންދިޔަ ޖަލްސާގައި ޓްރާންސްޕޯޓް އޮތޯރިޓީ އުވާލަން ފާސްކުރީ 52 މެންބަރުންގެ އިއްތިފާގުންނެވެ. ޓްރާންސްޕޯޓް އޮތޯރިޓީގެ ޚިދުމަތްތައް ލަސްވެ ރައްޔިތުންގެ ޝަކުވާ ބޮޑުވެފައިވާތީ ޓްރާންސްޕޯޓް އޮތޯރިޓީގެ މުދަލާއި މަސައްކަތްތަކުގެ އިތުރުން މުވައްޒަަފުން ޓްރާންސްޕޯޓް މިނިސްޓްރީއަށް ބަދަލުކޮށް, އޮތޯރިޓީ އުވާލަން ހިމަނައި، "މޯލްޑިވްސް ޓްރާންސްޕޯޓް އޮތޯރިޓީގެ ޤާނޫނު" އުވާލުމަށް ސަރުކާރުން ހުށަހެޅީ މިދިޔަ އޭޕްރީލް މަހުގެ ތެރޭގައެވެ.
ޓްރާންސްޕޯޓް އޮތޯރިޓީގެ ގާނޫނު އުވާލަން ސަރުކާރުން ހުށައެޅީ އެ އޮތޯރިޓީ އާއި މިނިސްޓްރީގެ މެންޑޭޓްގެ ތެރޭގައި ފުށުއަރާ ކަންތައްތަކެއް ހުރުމުން ކަމަށް ޓްރާންސްޕޯޓް މިނިސްޓްރީން ވަނީ ކުރިން ހާމަކޮށްފައެެވެ. އަދި އެމިނިސްޓްރީގެ ދަށުން ކުރަމުންގެންދެވި މަސައްކަތަކާއި، ދެއްވަންމުންގެންދަވާ ހިދުމަތްތައް ވީހާވެސް އަވަސްކަމާއެކު ރައްޔިތުންނަށް ފޯރުކޮށްދިނުމަށްވަނީ ބައެއް ބަދަލުތައް ގެނެސް ޚިދުމަތްތައް އަވަސްކޮށްފައެވެ.
އެ އޮތޯރިޓީގެ ގާނޫނު އުވާލަން ފާސްކުރުމުގެ ކުރިން ގައުމީ ތަރައްގީއާއި ތަރިކައިގެ ކޮމިޓީއާއި ލާމަރުކަޒީ ކޮމިޓީގެ ޖޮއިންޓް ކޮމިޓީންވަނީ އެކަމާއި ގުޅޭގޮތުން މިނިސްޓްރީ އޮފް ޓްރާންސްޕޯޓް އެންޑް ސިވިލް އޭވިއޭޝަނާއި މޯލްޑިވްސް ޓްރާންސްޕޯޓް އޮތޯރިޓީ އާއި އެޓާނީ ޖެނެރަލް އަދި ލޯކަލް ގަވާމެންޓް އޮތޯރިޓީއާއި ވެސް ބައްދަލުކޮށް މަޝްވަރާކޮށްފައެވެ.
