އެހެންގައުމެއްގެ ސިފައިންނަށް ރާއްޖޭގައި ނުތިބެވޭނެ ގޮތަށް ހަދަން މަޑުއްވަރީ ދާއިރާގެ މެމްބަރު އާދަމް ޝަރީފު ހުށަހެޅުއްވި އިސްލާހު މަޖިލީހުން ބޭރުކޮށްލައިފިއެވެ.
ރާއްޖެއިން އިންޑިޔާއާއެކު ވެފައިވާ އެއްބަސްވުންތަކުގައި ދިވެހި ރާއްޖޭގެ ގައުމީ ސަލާމަތަށް ނުރައްކާވާނެފަދަ ކަމެއް ނެތްކަމަށް ސަލާމަތީ ހިދުމަތްތަކާއި ބެހޭ ކޮމެޓީ އިން ނިންމާ ތައްޔާރުކޮށްފައިވާ ރިޕޯޓަށް އާދަމް ޝަރީފް ވަނީ 13 އިސްލާހެއް ހުށަހަޅުއްވާފައެވެ. މީގެ ތެރޭގައި 241 ކޮމިޓީގެ ރިޕޯޓުގައި ހިމެނޭ ހުށަހެޅުންތަކަށް ދެ ހުށަހެޅުމެއް އިތުރު ކުރަން ހިމަނާފައިވެއެވެ. އެންމެ ފުރަތަމަ އިސްލާހެއްގެ ގޮތުން ހުށަހަޅާފައިވަނީ، އިންޑިއާ އާއެކުވެފައިވާ އެއްބަސްވުންތައް 241 ކޮމިޓީގެ މެންބަރުންގެ އަތަށް ދިނުމަށްފަހު ދިރާސާކުރުމަށެވެ. ނަމަވެސް އެމްޑީޕީގެ މެޖޯރިޓީ އޮންނަ އެ ކޮމިޓީން މި ހުށަހެޅުން ފާހެއް ނުވިއެވެ.
ދެވަނައަށް ހުށަހެޅި އިސްލާހުގައި އެހެން ގައުމެއްގެ އަސްކަރީ ސިފައިން ރާއްޖޭގައި ދާއިމީ ގޮތެއްގައި ނުތިބެވޭނެ ގޮތަކަށް ސަރުކާރުގެ ސިޔާސަތު ބަދަލު ކުރަން ރައްޔިތުންގެ މަޖިލީހުން އެންގުމެވެ. މިރޭ ކުރިއަށްދިޔަ ޖަލްސާގައި އާދަމް ޝަރީފުގެ މި ހުށަހެޅުންތައް ފާސްކުރަން ފެންނަ ކަމަށް ވޯޓު ދެއްވީ ހަ މެންބަރަކެވެ. ފާސްކުރަން ނުފެންނަ ކަމަށް 53 މެންބަރުން ވޯޓު ދެއްވިއެވެ.
