ކުރީގެ ރައީސް ޔާމީން މިނިވަންވުމުން އިދިކޮޅުން އުފާ ފާޅުކުރަން ފަށައިފިއެވެ.
އެގޮތުން ރައީސް ޔާމީންއަށް މަރުހަބާ ކިއުމަށްޓަކައިވެސް މިވަގުތު އެމަނިކުފާނުގެ ގެކޮޅު ކައިރިއަށް ވަނީ ގިނަ އަދަދެއްގެ ސަޕޯޓަރުން ވެސް އެއްވެފައެވެ.
ރައީސް ޔާމީން އަށް އިއްވާފައި އޮތް ފަސް އަހަރުގެ ޖަލު ހުކުމުން އެމަނިކުފާނު މިއަދު ސަލާމަތް ވި އިރު ވަނީ ޖަލުގައި 732 ދުވަސް ހޭދަކުރައްވާފައެވެ. މިއީ ރާއްޖޭގެ ރައީސްކަން ކުރެއްވި ރައީސަކު މިހާ ގިނަ ދުވަސް ވަންދެން ބަންދުގައި ހޭދަކުރެއްވި ފުރަތަމަ ފަހަރެވެ.
ރައީސް ޔާމީން ޖަލަށް ލާން ކުރި ހުކުމާ މެދު ސުޕްރީމް ކޯޓުން ގޮތެއް ނިންމިއިރު، ކްރިމިނަލް ކޯޓުގައި މިހާރު ވެސް ރިޝްވަތާއި މަނީ ލޯންޑަރިންގގެ މައްސަލައެއް ޔާމީނާ ދެކޮޅަށް އަންނަނީ ހިންގަމުންނެވެ. އަދި މަނީ ލޯންޑަރިންގެ އައު ދައުވާއެއް ޕީޖީ ވަނީ މިދިޔަ ބުދަ ދުވަހު ރައީސް ޔާމީނާ ދެކޮޅަށް އުފުލާފަ އެވެ. އެއީ ވ. އާރަށް ކުށްޔަށް ދޫކުރުމުގައި އެއް މިލިއަން ޑޮލަރުގެ ރިޝްވަތު ނަގައި އެ ފައިސާ ލޯންޑަރކުރިކަމުގެ ތުހުމަތުގަ އެވެ.
