ކުރީގެ ރައީސް އަބްދުﷲ ޔާމީން މިނިވަންވީ ޝަރުއީ ދާއިރާ މިނިވަންވުމުން ކަމަށް މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެއެވެ.
މިރޭ ކުރިއަށް ގެންދިޔަ "އާސްކް ސްޕީކާ" ޕްރޮގްރާމްގައި އާއްމުންގެ ފަރާތުން މީހަކު ސުވާލު ކުރުމުން ނަޝީދު ވިދާޅުވީ، އިދިކޮޅު ލީޑަރު ޔާމީންގެ މައްޗަށް ކޮށްފައިވާ ހުކުމް ބާތިލް ކުރުމަށް ސުޕްރީމް ކޯޓުން ނިންމުމުން ޝަރުއީ ދާއިރާ މިނިވަން ވެފައިވާ ކަން އެނގިގެން ގޮސްފައިވާ ކަމަށެވެ.
ނަޝީދު ވިދާޅުވީ، ކުރީގެ ރައީސެއްގެ މައްޗަށް އިއްވި ހުކުމެއް ސުޕްރީމް ކޯޓުން ބާތިލް ކުރުމަކީ މިހާތަތަނަށް ރާއްޖޭގައި ފުރަތަމަ ފަހަރަށް ހިނގި ކަމެއް ކަމަށެވެ. އަދި މިއަދު ސުޕްރީމް ކޯޓުން ނިންމި ނިންމުމާ މެދު ހިތްހަމަ ޖެހޭ އަދި ނުޖެހޭ ބަޔަކުވެސް ތިބޭނެ ކަމަށާއި އެންމެން ވެސް މިއަދު ގަބޫލު ކުރާ ކަމަކީ ޝަރުއީ ކޯޓުތައް، އިސްލާހު ވެގެން އަންނަ ކަން ކަމަށެވެ. ނަޝީދު ވިދާޅުވީ މިއަދު އެނގިގެން ދިޔައީ ޕީޖީ އޮފީހުގެ ތަހުގީގު އާއި ފުލުހުންގެ ތަހުގީގުގައިވެސް މައްސަލަތަކެއް ހުރިކަން ކަމަށް ވާއިރު ދެން ފަށަންވީ މިކަން ކަން އިސްލާހު ކުރުމުގެ މަސައްކަތް ކަމަށެވެ.
