ވެކްސިންގެ ބޫސްޓަރ ޑޯޒް ޖެހި މީހުންގެ އަދަދު 15 ހާހުން މައްޗަށް އަރައިފިއެވެ.
މިހާތަނަށް ބޫސްޓަރ ޑޯޒް މުޅި ރާއްޖެއިން ޖަހާފައިވަނީ 15،416 މީހުންނެވެ.
އެޗްޕީއޭއިން ބުނީ އާދިއްތަ ދުވަހު އެކަނިވެސް 1443 މީހުން ބޫސްޓަރ ޑޯޒް ޖެހި ކަމަށެވެ. މީގެ ތެރޭގައި ހިމެނެނީ މާލެ ސަރަހައްދުން ބޫސްޓަރ ޑޯޒް ޖެހި 165 މީހުންނާއި އަތޮޅުތެރެއިން ބޫސްޓަރ ޑޯޒް ޖެހި 1278 މީހުންނެވެ. މިހާތަނަށް ރާއްޖެއިން ކޮވިޑް ވެކްސިން ޖެހި ޖުމުލަ އަދަދަކީ 395،907 މީހުންނެވެ. މީގެ ތެރޭގައި ހިމެނެނީ ވެކްސިންގެ ދެ ޑޯޒް ފުރިހަމަ ކުރި 364،520 މީހުންނެވެ.
ބޫސްޓަރ ޑޯޒް ވެކްސިން އަށް އެޕޮއިންޓްމަންޓް ދޫކުރަން އޭޑީކޭއިން ވަނީ މިހާރު ފަށައިފައެވެ. އެގޮތުން ކޮންމެ ދުވަހަކު މެންދުރު ފަހު ތިނަކުން ފަހަކަށް ވެކްސިން ޖެހުން އޭޑީކޭއިން ކުރިއަށް ގެންދެއެވެ.
ހުޅުމާލެ ހޮސްޕިޓަލުންވެސް ޕައިޒަރ ވެކްސިންއަށް އެޕޮއިންޓްސްމަންޓްސް ދޫކުރާ އިރު ބޫސްޓަރ ޑޯޒް ޖަހައިދެނީ މެންދުރުފަހު އެކަކުން ތިނަކަށެވެ. އައިޖީއެމްއެޗުން ކޮންމެ އަންގާރަ ބުދަ އަދި ބުރާސްފަތި ދުވަހު ވެކްސިން ޖަހައިދެނީ ހެނދުނު 10 އަކުން މެންދުރު ފަހު ދެއަކަށެވެ.
ދަމަނަވެށިންވެސް ވެކްސިން ޖަހައިދެނީ އެޕްއިންޓްމަންޓަށެވެ. ދަމަނަވެށިންވެސް ވެކްސިން ޖެހުން ކުރިއަށް ގެންދަނީ މެންދުރު ފަހު އެކަކުން ތިނަކަށެވެ.
