ދައުރުން ބޭރުން މަޖިލީހުގެ ޖަލްސާއެއް ބޭއްވުމުގެ މަސައްކަތް ކުރާ ކަން އެމްޑީޕީން ހާމަކޮށްފިއެވެ.
އެގޮތުން މިރޭ ކުރިއަށްގެންދިޔަ އެމްޑީޕީގެ ޕާލިމެންޓްރީ ގްރޫޕްގެ ބައްދަލުވުމަކަށް ފަހު އެމްޑީޕީގެ ޕީޖީ ލީޑަރު، މެދު ހެންވޭރު ދާއިރާގެ މެންބަރު އަލީ އާޒިމް ކުރެއްވި ޓުވީޓެއްގައި ވިދާޅުވީ، މިހާރު ދައުރުން ބޭރުން މަޖިލީހުގެ ޖަލްސާއެއް ބޭއްވުމަށް އެދެން ނިންމަވައިފައިވާ ކަމަށެވެ. އެހެންނަމަވެސް މި ޖަލްސާ ބޭއްވުމަށް އެޕާޓީން އެދެނީ ކީއްވެ ކަމެއް އާޒިމް ހާމަކުރައްވައިފައެއް ނުވެއެވެ.
ނަމަވެސް ބައެއް މީޑިއާތަކުން ރިޕޯޓްކޮށްފައިވާ ގޮތުގައި މި ޖަލްސާ ބޭއްވުމުގެ މަސައްކަތް ކުރަމުން ދަނީ އެންޓި ކޮރަޕްޝަން ކޮމިޝަންގެ މެންބަރުން މަގާމުން ދުރު ކުރުމާމެދު ގޮތެއް ނިންމުމަށެވެ. އެންޓި ކޮރަޕްޝަން ކޮމިޝަންގެ މެންބަރުން ވަކިކުރުމަށް ރައްޔިތުންގެ މަޖިލީހުގެ ކޮމެޓީން ނިންމުމުން އެ ކޮމިޝަނުގެ މިހާރުގެ ރައީސް ޝިއުނާ ވިދާޅުވީ، އޭސީސީ އަށް ނަތީޖާ ނެރުމަށް މަސައްކަތް ކުރެވޭނީ މިނިވަންކަމާއިއެކު މަސައްކަތް ކުރުމުގެ ޖާގަ ދީގެން ކަމަށެވެ.
