އިދިކޮޅު ޕީޕީއެމް ޕީއެންސީގެ "އިންޑިއާ އައުޓް" ހަރަކާތަށް ފަންޑު ނުކުރާ ކަމަށް ޗައިނާ އިން ބުނެފިއެވެ.
ޕީޕީއެމްގެ ކައުންސިލަރ ނަހުލާ އިންޑިއާ އައުޓު ޓީޝާރޓްލައިގެން އިންޑިއާ އައުޓު ޖަހާފައިވާ ދިދައެއް ހިފައިގެން ޗައިނާ އެމްބަސީގެ ކުރިމަތީގައި ހުރި ފޮޓޯއެއް އިއްޔެ ސޯޝަލް މީޑިއާގައި ވަނީ ދައުރުވާން ފަށާފައެވެ. މި ފޮޓޯ އާއި ގުޅިގެން ސަރުކާރު ހިންގާ އެމްޑީޕީގެ ބައެއް މެމްބަރުން ވަނީ އިންޑިއާ އައުޓު ހަރަކާތަކީ ޗައިނާ އިން އަޑީގައި އޮވެގެން ކުރިއަށް ގެންދާ ހަރަކާތެއް ކަމަށް ތުހުމަތުކޮށްފައެވެ. ނަމަވެސް މި ފޮޓޯ އާއި ގުޅިގެން ކައުންސިލަރ ނަހުލާ ވިދާޅުވެފައިވަނީ ޗައިނާ އެމްބަސީ ކުރިމަތީ ހުރި ފޯޓޯއަކީ އިއްޔެ ހަވީރު އިދިކޮޅު ފަރާތްތަކުން ކުރިއަށް ގެންދަން އުޅުނު ސައިކަލު ބުރު ހުއްޓުވާ ޕެޕަރ ސުޕްރޭ ޖަހަން ފެށުމުން އެކަމުން ސަލާމަތްވާން އެތަނުގައި ހުއްޓާ ނަގާފައިވާ ފޮޓޯއެއް ކަމަށެވެ.
ޗައިނާ އެމްބަސީން ކުރި ޓުވީޓެއްގައި ބުނެފައިވަނީ އެ އެމްބަސީގެ ބޭނުމަކީ ރާއްޖެ އާއި ޗައިނާ އާއި ދެގައުމުގެ މެދުގައި އޮތް އެކުވެރިކަމާއި ގާތްގުޅުން ކުރިއެރުވުން ކަމަށެވެ.
އިންޑިއާ އާއި ޗައިނާ އާއި ދެ ގައުމަކީ ޒަމާނުއްސުރެ ދެބަސްވުން އުފެދި ހިޔާލު ތަފާތުވެފައި އޮންނަ ދެ ގައުމެވެ. އެހެންކަމުން އަބަދުވެސް އިންޑިއާ އާއި ދެކޮޅަށް ހިންގާ ހަރަކާތްތަކަކީ ޗައިނާއިން ފަންޑު ކުރާ ހަރަކާތްތަކެެއްގެ ގޮތުގައި ބައެއް ފަރާތްތަކުން ދަނީ ތުހުމަތު ކުރަމުންނެވެ.
