މެލޭޝިޔާއަށް ކުރަމުންދާ ވިއްސާރައިގައި ބައެއް ހިސާބުތަކުގައި ފެންބޮޑުވެފައިވާތީ، އެގައުމުގައި ދިރިއުޅޭ ދިވެހިން ސަމާލުވެތިބުމަށް ހައިކޮމިޝަނުން އިލްތިމާސްކޮށްފިއެވެ.
އެގައުމަށް ބޯކޮށް ވާރޭވެހި ފެންބޮޑުވެފައިވާތީ ގިނަ ބައެއްގެ ގެދޮރު ގެއްލިފައިވާ ކަމަށް މީޑިއާތަކުން ދަނީ ރިޕޯޓްކުރަމުންނެވެ. މެލޭޝިއާއަކީ ކިޔެވުމުގައާއި ވަޒީފާއަށް ދާ ދިވެހިން ގިނަ އަދަދަކަށް ދިރިއުޅެމުންދާ ގައުމެކެވެ. ހައިކޮމިޝަނުން ނެރެފައިވާ މެސެޖެއްގައި ބުނެފައިވަނީ، މެލޭޝިޔާގެ އެކި ސަރަހައްދުތަކަށް ހުއްޓުމެއްނެތި ބޯކޮށް ވިއްސާރަ ވެހެމުންދިއުމުގެ ސަބަބުން ބައެއް ހިސާބުތަކުގައި ފެންބޮޑުވެ މަގުތައް ބަންދުވެ ގިނަ ގުނަ ދަތިތަކާއި ކުރިމަތިލާންޖެހިފައިވާކަން ހުރިހާ ފަރާތްތަކުގެ ސަމާލުކަމަށް ގެންނަ ކަމަށެވެ.
އެހެންކަމުން ހުރިހާ ފަރާތްތަކުންވެސް މިކަމަށް ސަމާލުވެ ތިބުމަށާއި މުހިންމު ކަމެއްނެތި ބޭރުތެރޭގައި ނޫޅުމަށާއި އަދި މެލޭޝިޔާގެ ކަމާބެހޭ ފަރާތްތަކުން ނެރޭ ހަބަރުތަކާއި އެލާޓްތަކަށް ސަމާލުވެ ތިބުމަށް އެދޭ ކަމަށް ހައިކޮމިޝަންގެ މެސެޖުގައިވެއެވެ. އަދި މިކަމާއި ގުޅިގެން އެއްވެސް ފަރާތަކުން ހައިކޮމިޝަންގެ އެހީތެރިކަން ބޭނުންވާނަމަ ލަސްނުކޮށް އެ ކޮމިޝަންގެ ހޮޓްލައިން ނަމްބަރު 7895 655 12 60 + އަށް ގުޅުމަށްވެސް ވަނީ އެދިފައެވެ.
މެލޭޝިޔާގެ ބޮޑުވަޒީރު އިސްމާއީލު ސަބުރީ ޔައުގޫބު ވިދާޅުވީ އެ ގައުމުގެ އެކި ސަރަޙައްދުތަކުގައި ފެންބޮޑުވުމުގެ ސަބަބުން 11،000 މީހުންގެ ގެދޮރު ގެއްލި މަގުތައް ބަންދުވެ ކަނޑުމަގުން ކުރައި މުދަލުގެ ވިޔަފާރިތައް ހުއްޓިފައިވާ ކަމަށެވެ.
