ބަންގްލަދޭޝްގެ ބޮޑުވަޒީރު ޝެއިހު ހަސީނާ މިމަހުގެ 22 ވާ ބުދަ ދުވަހު ރާއްޖެ ވަޑައިގަންނަވާ ގޮތަށް ހަމަޖެހިފައިވާ ކަމަށް އެގައުމުގެ މީޑިއާތަކުން ރިޕޯޓްކޮށްފިއެވެ.
އެގޮތުން ޝެއިހު ހަސީނާ ރާއްޖެ ވަޑައިގަންނަވާނީ ދެ ދުވަހު ރަސްމީ ދަތުރުފުޅަކަށެވެ. ނަމަވެސް ރާއްޖެއިން ފުރާވަޑައިގަންނަވާނީ ކުރު ޗުއްޓީއެއް ހޭދަކުރެއްވުމަށްފަހު ކަމަށް ބަންގްލަދޭޝްގެ މީޑިއާތަކުން ވަނީ ރިޕޯޓްކޮށްފައެވެ. ބަންގްލަދޭޝްގެ ބޮޑުވަޒީރުގެ މިދަތުރުފުޅުގައި އެގައުމުގެ ޑޮކްޓަރުން ރާއްޖެ ގެނައުމާ ގުޅޭ ރަސްމީ އެއްބަސްވުމެއްގައި ދެގައުމުގެ ދެމެދުގައި ސޮއިކުރުމަށް ވަނީ ހަމަޖެހިފައެވެ.
މީގެ އިތުރުންވެސް ދެގައުމުގެ ގުޅުން އިތުރަށް ބަދަހި ކުރެވޭނެ ގޮތްތަކާއި ގުޅޭގޮތުން ރަސްމީ ވާހަކަތައް ބާއްވާނެ ކަމަށްވެސް މައުލޫމާތުލިބެއެވެ. ރާއްޖޭގެ ރައީސުލްޖުމުހޫރިއްޔާ އިބްރާހިމް މުހައްމަދު ސާލިހު ވަނީ މިއަހަރުގެ ތެރޭގައި ބަންގްލަދޭޝްއަށް ރަސްމީ ދަތުރުފުޅެއް ކުރައްވާފައެވެ. އަދި ދާދި ފަހު ނައިބު ރައީސް ފައިސަލް ނަސީމުވެސް ވަނީ އެގައުމަށް ދަތުރުފުޅެއް ކުރައްވާފައެވެ.
