އިންޑިއާ ކަނޑުގައި އުފެދެމުން އަންނަ ވާދަވެރި ކަމުގައި ދިވެހިރާއްޖެއަށް މިވަނީ ހައްސާސް އަދި އެހާމެ ނާޒުކު ހަތަރު އަނގޮޅިއަކަށް ހުއްޓެންޖެހިފައި ކަމަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެއެވެ.
ދައުރުން ބޭރުގައި މިއަދު ކުރިއަށް ގެންދިޔަ ޖަލްސާގެ ރިޔާސަތުގައި އިންނަވާ ވާހަކަފުޅު ދައްކަވަމުން ނަޝީދު ވިދާޅުވީ،
މި ހުއްޓުމުގައި ދިވެހިން ބޭނުމީ އިތުރު ރަހުމަތްތެރިންނާއެކު ގުޅުންބަދަހި ކުރަން ކަމަށާއި އެއްވެސް ގައުމެއްގެ ދައުރު އަދި ވަކިން ހާއްސަކޮށް އަވަށްޓެރި ގައުމުތަކުގެ ތެރެއިން އެތެރެވަރި ގައުމުތަކުގެ ދައުރެއް ރާއްޖޭގައި ނެތް ކަމަށް ބުނުމަކީ ހަމައެކަނި ހަގީގަތާ ހިލާފު ވާހަކަތަކެއް ނޫން ކަމަށް ގަބޫލުކުރައްވާ ކަމަށެވެ.
އަދި މިއީ އެހާމެ ދިވެހިންނަށް ނިކަމެތިކަން ލިބޭނެ ދެރަ ގޮތްތައް މެދުވެރި ކުރާނޭ ބުނުމެއް ފަލްސަފާއެއް ކަމަށް ނަޝީދު ވިދާޅުވިއެވެ.
ނަޝީދުގެ ވާހަކަފުޅުގައި އިތުރަށް ވިދާޅުވީ، ދިވެހިންގެ ދައުރު އިންޑިއާ ކަނޑުގައި ވަރަށް ބޮޑު ކަމަށާއި އެގޮތުން 10000 ވުރެ ގިނަ އުޅަނދުގައި 50 ހާހަށްވުރެ ގިނަ ދިވެހިން އަބަދުވެސް އިންޑިއާ ކަނޑުގައި ދަތުރު ކުރާނެ ކަމަށެވެ. ބަންގްލަދޭޝްގެ އެހީއާއި އެކުވެރިކަން ވެސް ރާއްޖެއަށް ބޭނުންވާ ސަބަބަކީ ބަންގްލަދޭޝް އަކީވެސް ގުޅިގެން އެކުވެރިކަން ބަދަހިކޮށްގެން ކުރިއަށްދާން މުހިންމު ގައުމެއް ކަމަށް ވާތީ ކަމަށް ވިދާޅުވިއެވެ.
ގަބޫލުކުރެވޭ ގޮތުގައި ނަޝީދު އިޝާރާތް ކުރައްވާފައިވަނީ މިހާރު އިދިކޮޅުން ކުރިއަށް ގެންދާ އިންޑިއާ އައުޓް ހަރަކާތަށެވެ. ނަމަވެސް ސީދާކޮށް ނަޝީދު އެހެން ވިދާޅެއް ނުވެއެވެ.
