ބަންގްލަދޭޝްގެ ބޮޑުވަޒީރުގ ދިވެހިރާއްޖެއަށް ކުރައްވާ ރަސްމީ ދަތުރުފުޅާ ގުޅިގެން މާދަމާ މާލޭގައި ކުރިއަށްދާ ރަސްމީ ހަރަކާތްތަކާ ގުޅިގެން އެހަރަކާތްތަކަށް މާލޭގެ ހަތަރު ސަރަހައްދެއް ބަންދުކުރަން ނިންމައިފިއެވެ.
އެގޮތުން ބަންދުކުރުމަށް ހަމަޖެހިފައިވާ ހަތަރު ސަރަހައްދަކީ ޖުމްހޫރީ މައިދާން ސަރަހައްދާއި ރައީސް އޮފީސް ހިމެނޭ ސަރަހައްދާއި ހޮޓެލް ޖެން ހިމެނޭ ސަރަހައްދާއި ރައްޔިތުންގެ މަޖިލިސްކުރާގެ ހިމެނޭ ސަރަހައްދެވެ. މި ސަރަހައްދުތައް މާދަމާގެ ހެނދުނު 07:00 އިން 20:00 އަށް، ހަރަކާތްތަކަށް އެކި ވަގުތުތަކުގައި އާންމު ދަތުރު ފަތުރަށާއި ފައިމަގުގައި އުޅޭ ފަރާތްތަކަށް ބަންދުކުރެވޭނެ ކަމަށް ފުލުހުން ހާމަކުރެއެވެ.
އެސަރަހައްދުތައް ބަންދުކުރުމުގައި ފުލުހުން ހަރަކާތްތެރިވަމުންދާ ތަންތަނަކީ:
- ބޮޑުތަކުރުފާނު މަގު އެމް.އެމް.އޭ ކައިރި
- އޯކިޑްމަގު/ ޖޫމްހޫރީ މައިދާން ޖަންގްޝަން
- ބޮޑުތަކުރުފާނު މަގު/ ބީއެމްއެލް ކައިރިން (ލޮޓަސް ގޯޅި)
- ނާދީ ގޯޅި
- އަމީރު އަޙްމަދު މަގު/ ފިނިހިޔާ ގޯޅި ކަންމަތި
- ސޯސަންމަގު/ މެދުޒިޔާރަތްމަގު ޖަންގްޝަން
- އަބަދަށްފެހިމަގު/ ގުލޭނޫރަންމަގު ކަންމަތި
- ގުލޭނޫރަންމަގު/ ކަރަންކާމަގު ކަންމަތި
- ހިތަށްފިނިވާމަގު/ކަރަންކާމަގު ކަންމަތި
- ކަޅުހުރާމަގު/ހަދީބީ މަގު ކަންމަތި
- ހުސްނުހީނާމަގު/ ބޮކަރުމާ ގޯޅި ކަންމަތި
- ނޫރާނީ ގޯޅި/ ހިތަށްފިނިވާމަގު ކަންމަތި
- މެދުޒިޔާރަތްމަގު/ ދަރުމަވަންތަ ސްކޫލު ކަންމަތި
- ޝަހީދު އާދަމް ނަސީރު ހިނގުން
- ޝަހީދު ޢަބްދުﷲ ޒުހައިރު ހިނގުން
މީގެއިތުރުން އެސަރަހައްދުތަކުގައި ހިމެނޭ ޕާކިންގ ޒޯންތަކުގައި މިރޭގެ 20:00 އިން ފެށިގެން މާދަމާ ދުވަހުގެ 20:00 އާހަމައަށް ޕާކް ނުކުރެވޭނެ ކަމަށާއި އަދި މިވަގުތުތަކުގައި އެސަރަހައްދުތަކުގައި ހުރި ޕާކިންގ ޒޯންތަކުގައި ނުނަގާ ހުރި އުޅަނދެއްވާނަމަ، ހަމަޖެހިފައިވާ އުސޫލުގެ ތެރެއިން އެއުޅަނދުތައް ޓޯވކުރުމުގެ މަސައްކަތް ފުލުހުން ކުރަމުންދާނެ ކަމަށްވެސް ބުނެފައިވެއެވެ.
ހަމައެއާއެކު މިއަދުގެ 18:00 އިން ފެށިގެން އިއްޒުއްދީން ފާލަން ހިމެނޭ ސަރަހައްދުގެ ފަޅުތެރެއަށް އޮޑިދޯނި ފަހަރާއި ލޯންޗު، ޑިންގީ ފަދަ ތަކެތި ވަނުމަކީ މަނާކަމެއް ކަމަށާއި އެހެންކަމުން އެސަރަހައްދު ބޭނުންކުރާ ފެރީތަކުން ދަތުރުކުރައްވާ ބޭފުޅުން ފެރީދަތުރު ރާވާ އެޖެންޓުން މެދުވެރިކޮށް ލަފާ ފުރާ ސަރަހައްދަށް އައިސްފައިވާ ބަދަލު އޮޅުންފިލުވައި، ކަނޑައަޅާ ސަރަހައްދުތަކަށް ދިއުމަށް ވަނީ އިލްތިމާސްކޮށްފައެވެ.
ބަންގްލަދޭޝްގެ ބޮޑުވަޒީރުގެ ރަސްމީ ދަތުރުފުޅާ ގުޅިގެން ސިނަމާލެ ބްރިޖްގެ އޮޕަރޭޝަނަށް އެއްވެސް ބަދަލެއް ގެނެސްފައިނުވެއެވެ. އަދި ކުރިއެކޭ އެއްގޮތަށް އާއްމު ދަތުރު ފަތުރަށް ބްރިޖް ބޭނުންކުރެވޭނެ ކަމަށް ފުލުހުން ބުނެއެވެ.
ބަންގްލަދޭޝް ބޮޑުވަޒީރުގެ ރަސްމީ ދަތުރުފުޅާ ގުޅިގެން މާލޭގެ އާންމު ދަތުރުފަތުރަށް އަންނަ ބަދަލުތަކަށް ދުރާލައި ތައްޔާރުވެ، ބަންދުކުރެވިފައިވާ މަގުތައް ނޫން އެހެން މަގުތައް އިހްތިޔާރުކުރައްވައިގެން ދަތުރުފަތުރުގެ ކަންކަން ކުރިއަށް ގެންދެވުމަށް ފުލުހުން އިލްތިމާސްކުރެއެވެ.
