ސަރުކާރުގެ ސިޔާސަތުތައް ވީހާ އަވަހަކަށް އަދި ފަސޭހައިން ތަންފީޒު ކުރުމަކީ ވަރަށް މުހިންމު ކަމެއްކަމަށާއި އެ ކަން އެންމެ ފުރިހަމައަށް ކުރެވޭނީ، ސިޔާސީ މަޤާމުތަކުގައި ތިއްބެވި ބޭފުޅުންނާއި، ސިވިލް ސަރވިސް މުވައްޒަފުން މިހާރަށްވުރެ ބޮޑަށް ގުޅިގެން މަސައްކަތް ކޮށްގެންކަމަށް ރައީސް އިބްރާހިމް މުހައްމަދު ޞާލިހު ވިދާޅުވެއްޖެ އެވެ.
ރައީސް މިފަދައިން ވިދާޅުވީ ހިންގުމުގެ ދާއިރާގެ އިސް މުވައްޒަފުންގެ ހުނަރާއި ޤާބިލުކަން އިތުރުކުރުމުގެ ޕްރޮގްރާމް އިފްތިތާޙު ކުރުމުގެ ރަސްމިއްޔާތުގައި ވާހަކަފުޅު ދައްކަވަމުންނެވެ. އެރަސްމިއްޔާތުގައި ރައީސް ވިދާޅުވީ ރައްޔިތުންނަށް ޚިދުމަތް ކުރުމާ ޙަވާލުވީ، ރައްޔިތުންނަށް ބޭނުންވާ ވަރަށް ގިނަ އަސާސީ އަދި އިޖުތިމާޢީ ޚިދުމަތްތަކެއް، ވަކި މުއްދަތުތަކެއްގައި ފުރިހަމަކޮށްދޭން ވަޢުދުވެގެންކަމަށެވެ. އެކަން ހަނދާނުން ފޮހެވިގެން ނުވާނެކަމަށާއި އެއީ ވަކި މީހަކަށް ނުވަތަ ވަކި މުއައްސަސާއަކަށް އެކަނި ކުރެވޭނެ ކަމެއް ނޫންކަމަށް ރައީސް ވިދާޅުވި އެވެ.
މި މަސައްކަތް ކުރަނީ، ވަކިވަކި އޮފީސްތަކެއްގެ ގޮތުގައި ކަމަށްވިޔަސް، މިއީ އެއް ސަރުކާރެއްކަމަށާއި އޮންނާނީ އެއް ސިޔާސަތެއްކަމަށާއި އަދި ޙާޞިލުކުރަން ބޭނުންވަނީވެސް އެއް ނަތީޖާއެއްކަމަށް ރައީސް ވިދާޅުވި އެވެ.
އެ ނަތީޖާ ނެރެވޭނީ ސަރުކާރުގެ ހުރިހާ މުއައްސަސާތައް ގުޅިގެން، އެއް މިޞްރާބަކަށް ދަތުރުކޮށްގެން.
- ރައީސް އިބްރާހިމް މުހައްމަދު ޞާލިހު
ހިންގުމުގެ ދާއިރާގެ އިސް މުވައްޒަފުންގެ ހުނަރާއި ޤާބިލުކަން އިތުރުކުރުމުގެ ޕްރޮގްރާމް އިފްތިތާޙު ކުރުމުގެ ރަސްމިއްޔާތު
ކޮވިޑް-19 ގެ ބަލިމަޑުކަމުގެ ތެރޭގައި މުޅި ސަރުކާރުން ކަނޑައެޅީ އެންމެ ސިޔާސަތެއްކަމަށް ރައީސް ވިދާޅުވި އެވެ. އެގޮތުން އެސިޔާސަތަކީ ކޮވިޑުގެ ބަލިމަޑުކަމުން ދިވެހީންނާއި ދިވެހިރާއްޖޭގައި އުޅޭހާ ބަޔަކު ރައްކާތެރިކުރުންކަމަށް ވިދާޅުވި އެވެ. ރައީސް ވިދާޅުވީ އެ ވަބާގެ ސަބަބުން ކުރިމަތިވި އިޤްތިޞާދީ ދަތިތަކުން އަރައިގަނެ، ޤައުމު އަލުން ތަރައްޤީ ކުރުމުގެ މަސައްކަތް ވީހާ އަވަހަކަށް ފެށުމަކީ އެސިޔާސަތުގެ ބައެއްކަމަށެވެ.
މިސިޔާސަތު ތަންފީޒުކުރުމުގައި އެންމެން ކުރި މަސައްކަތުގެ ނަތީޖާއެއްގެ ގޮތުން ބަލި ފެތުރެން ފެށިތާ ދޮޅު އަހަރެއްހާ ދުވަހުގެ ތެރޭގައި، ފުރަބަންދުގެ ޙާލަތު މުޅިން އުވާލައި، އިޤްތިޞާދީ ޙަރަކާތްތަކާއެކު، އަލުން ހިންދެމިލާނެ ފުރުޞަތު ލިބިފައިވާކަމަށް ރައީސް ވިދާޅުވި އެވެ. ކޮވިޑުގެ ދުވަސްވަރު ސަރުކާރުގެ އެކި މުއައްސަސާތަކުގައި ތިއްބެވި ލީޑަރުން ދެއްކެވި ހިތްވަރަށް ރައީސް ޝުކުރު އަދާކުރެއްވި އެވެ.
އެ ދުވަހު އެ މަސައްކަތް އެހާ ފުރިހަމައަށް ނުކުރެއްވިނަމަ، މިއަދު އަޅުގަނޑުމެން މި ފޯރަމްގައި ނުތިބީސް. އަޅުގަނޑުމެންގެ ލޯބިވާ އަޚުންނާއި އުޚުތުންގެ ގިނަ ބަޔަކު މިއަދު ދުނިޔޭގައިވެސް ނުތިބީސް.
- ރައީސް އިބްރާހިމް މުހައްމަދު ޞާލިހު
މީގެ އިތުރުން ރައީސް ވަނީ ސިޔާސީ މަގާމުތަކުގައި ސަރުކާރުގެ އެކި މުއައްސަސާތަކުގައި ތިއްބެވި ބޭފުޅުންނަށްވެސް ޝުކުރު އަދާކުރައްވައިފަ އެވެ. އެގޮތުން ކޮވިޑާއި ގުޅިގެން ސަރުކާރުން ގެންގުޅުނު ސިޔާސަތު ތަންފީޒު ކުރުމުގައި އެންމެ އިސްކޮށް ތިއްބެވީ ސިޔާސީ މުވައްޒަފުންކަމަށް ރައީސް ޞާލިހު ވިދާޅުވި އެވެ. އަދި ވިދާޅުވީ ސިޔާސީ މީހުންނަކީ، ހަމައެކަނި ކަންކަމުގައި ބަސްކިޔައި، ގޮތެއް ނިންމަން ތިބޭ ބައެއް ނޫންކަމަށާއި ޢަމަލީގޮތުން ކަންކަން ކުރުމަކީ އެންމެ އިސް އެއް މަސްއޫލިއްޔަތުކަމަށެވެ.
މީގެ އިތުރުން ސިވިލް ސާވިސް މުވައްޒަފުންނާއި ގުޅޭގޮތުން ވާހަކަފުޅު ދައްކަވަމުން ރައީސް ވިދާޅުވީ ވެރިކަން ކުރަނީ ކޮން ޕާޓީއެއްތޯ، ސަރުކާރުގައި ތިބީ ކޮން ބައެއްތޯ ބެލުމަކީ، ސިވިލް ސަރވިސްގެ ދައުރު ނޫންކަމަށެވެ. ސިވިލް ސަރވިސްގެ ދައުރަކީ، އެއިރަކު އޮންނަ ސަރުކާރެއްގެ ސިޔާސަތުތައް ތަންފީޒު ކުރުންކަމަށާއި ރައްޔިތުންގެ އަޣްލަބިއްޔަތު ލިބިގެން، ވަކި މެނިފެސްޓޯއެއް ތަންފީޒު ކުރުމަށް، އެއިރަކު އުފެދިފައި އޮންނަ ސަރުކާރަކަށް، ސިވިލް ސަރވިސްގެ މުހިންމުކަން ބޮޑުވަނީވެސް އެ ސަބަބަށްޓަކައިކަމަށް ރައީސް ވިދާޅުވިއެވެ.
