ރައީސް އިބްރާހިމް މުހައްމަދު ޞާލިހުގެ ސަރުކާރުން އިސްކަން ދެނީ ގައުމުގެ އެންމެ މުހިންމު ދާއިރާތަކުން މީހުން ބިނާކުރުމަށް ކަމަށާއި އެގޮތުން އޭވިއޭޝަން ދާއިރާއިން މީހުން ބިނާ ކުރުމަކީ ގައުމުގެ ތަރައްގީގެ ކުރިމަގަށް މުހިންމު މަސައްކަތެއްކަމަށް ރައީސުލްޖުމްހޫރިއްޔާގެ ނައިބު ފައިސަލް ނަސީމް ވިދާޅުވެއްޖެ އެވެ.
ނައިބުރައީސް މިފަދައިން ވިދާޅުވީ މޯލްޑިވިއަން އޭވިއޭޝަން އެކެޑަމި ހުޅުވުމުގެ ގޮތުން އަންގާރަދުވަހު ބޭއްވި ރަސްމިއްޔާތުގައި ވާހަކަފުޅު ދައްކަވަމުންނެވެ. އެގޮތުން ފައިސަލް ވިދާޅުވީ ރާއްޖޭގައި އެއާޕޯޓުތައް އިތުރުވެ ވައިގެ މަގުން ކުރާ ދަތުރުތައް އިތުރުވަމުން ދާއިރު މިދާއިރާގައި މަސައްކަތްކުރާ މީހުންވެސް އިތުރުކުރަންޖެހޭ ކަމަށެވެ. ސަރުކާރުން މީހުން ބިނާކުރަން އިސްކަންދޭ އެހެން ދާއިރާތައްވެސް ނައިބުރައީސް ފާހަގަކުރެއްވި އެވެ. އެގޮތުން ވިދާޅުވީ ޑޮކްޓަރުންނާއި، އިންޖިނިއަރުންނާއި، މެންޓަލް ހެލްތުގެ ދާއިރާފަދަ މީގެކުރިން މީހުން ބިނާކުރަން މާބޮޑު މަސައްކަތެއް ނުކުރެވޭ ދާއިރާތަކުން މިހާރު މީހުން ބިނާކުރަން ފަށާފައިވާކަމަށެވެ.
މީހުން ބިނާކުރުމުގެ ދާއިރާއަކީ މިސަރުކާރުން އެންމެ ބޮޑު ހޭދައެއް ކުރާ އެއް ދާއިރާކަމަށް ނައިބުރައީސް ވިދާޅުވި އެވެ. އޭވިއޭޝަން ދާއިރާއަށް ބަލާއިރު ރާއްޖޭގައި ދަތުރުފަތުރުގެ ނިޒާމަށް މުޅިން އިންގިލާބީ ބަދަލެއް އައުމުގެ މަގުމަތީގައި އުޅޭކަން ފައިސަލް ފާހަގަކުރެއްވި އެވެ.
"ދިވެހިރާއްޖޭގެ އަތޮޅުތަކަށް ބަލައިފިކަމަށް ވަންޏާ ކޮންމެ އަތޮޅަކަށްވެސް އެއާޕޯޓުތަކަށް އުދުހިގެން މިހާރު އެބަ ދެވޭ. ރާއްޖޭގެ ރިޒޯޓުތަކަށް ބަލައިފިކަމަށް ވަންޏާ 150 އަށްވުރެއް ގިނަ ރިޒޯޓު މިހާރުވެސް އޮޕަރޭޝަންގަ އޮތްއިރު މިތަންތަނަށްވެސް ދުނިޔޭގެ އެކި ގައުމުތަކުން ރާއްޖެއަށް ދަތުރުކުރާ، ރާއްޖެއަށް އެ ޒިޔާރާތްކުރާ ފަރާތްތައް މިގެންދަންޖެހެނީ މިދެންނެވިގޮތަށް (ވައިގެމަގުން)" ނައިބުރައީސް ވިދާޅުވި އެވެ.
މީހުން ބިނާ ކުރުމުގައި ސަރުކާރުން ކުރަމުންދާ މަސައްކަތުގެ އިތުރުން އަމިއްލަ އެކި ފަރާތްތަކުން ކުރަމުންދާ މަސައްކަތްވެސް ނައިބުރައީސް ފައިސަލް ފާހަގަކުރެއްވި އެވެ. މިހާރު ފުރުސަތުތައް ވަރަށް ފުޅާކުރެވިފައިވާކަން ފާހަގަކުރައްވަމުން އެމަނިކުފާނު އިތުރަށް ވިދާޅުވީ ދިވެހިންނަކީ ވަރަށް ފަސޭހައިން ކަންކަން ދަސްކުރާ ބައެއް ކަމަށާއި މިސަބަބަށްޓަކައި ބޭރުގައި ތައުލީމު އުނގެނޭ ފަރާތެއްކަމުގައި ވިޔަސް ދިވެހިން އަބަދުވެސް ފާހަގަކޮށްލެވޭކަމަށެވެ.
ކޮންމެ މީހެއްގެވެސް ވިސްނުމަކަށް ވާންޖެހޭނީ ދަސްކުރި އެއްޗެއްގެ ބޭނުން އެންމެ ހެޔޮ ގޮތުގައި ހިފުން ކަމަށާއި މަސައްކަތުގެ މާހައުލުގައި އެހެން މީހުންނާއި އެކީގައި މަސައްކަތް ކުރެވެންޖެހޭނެކަމަށްވެސް ނައިބުރައީސް ވިދާޅުވި އެވެ.
"އަޅުގަނޑުމެންގެ ވިސްނުންވެސް، އަޅުގަނޑުމެންގެ ގައުމު ތަރައްގީކުރުމުގައި ކުރާ މަސައްކަތާއި އެއްވަރަށް ބަދަލުކޮށްލެވެންޖެހޭނެ. އެކަން ކުރެވޭނީ އެކުއެކީގައި މަސައްކަތް ކުރެވިގެން" ނައިބުރައީސް ވިދާޅުވި އެވެ.
އަންގާރަ ދުވަހު ހުޅުވުނު މޯލްޑިވިއަން އޭވިއޭޝަން އެކެޑަމީ އަކީ އައިލެންޑް އޭވިއޭޝަން ސަރވިސަސް ލިމިޓެޑާއި، މޯލްޑިވްސް ނެޝަނަލް ޔުނިވަރސިޓީއިން ތިރީސް އަހަރަށް ވުރެ ގިނަ ދުވަހުގެ ތަޖުރިބާ ހުރި ޗެކް ރިޕަބްލިކްގެ ޕްލައިން ސްކޫލެއް ކަމަށްވާ ފްލައިންގ އެކެޑަމީއާ ގުޅިގެން ހިންގާ ފްލައިންގ ސްކޫލެކެވެ. މި ސްކޫލްގައި ކިޔެވުމަށް ބޭނުންވާ ދަރިވަރުންނަށް މިއަދުން ފެށިގެން ކޯހަށް އެދި ހުށަހެޅުމުގެ ފުރުޞަތު ހުޅުވާލާފައިވީ ނަމަވެސް ފުރަތަމަ އިސްކަން ދެނީ އެކި ސަބަބުތަކާ ހުރެ ކޯސް މެދުކެނޑިފައިވާ ދަރިވަރުންނަށެވެ.
