ރާއްޖޭގައި ފެނާއި ނަރުދަމާގެ ނިޒާމު ގާއިމް ނުކުރާ ހުރިހާ ރަށެއްގައި އެމަޝްރޫއުތައް ފަށަން ކުންފުނިތަކާއި މިއަދު ހަވާލުކޮށްފި އެވެ.
ފެނާއި ނަރުދަމާގެ ނިޒާމު ޤާއިމުކުރުމުގެ މަސައްކަތް ހަވާލުކޮށްފައި ވާ ކުންފުނިތަކުގެ ތެރޭގައި ފެނަކަ ކޯޕަރޭޝަން، ސްޓެލްކޯ، މާކެޓެކް މޯލްޑިވްސް، އަދި ޑުޕްލެކްސް ޕްރައިވެޓް ލިމިޓެޑް ހިމެނެ އެވެ. މިއަދު ހަވާލުކުރި މަޝްރޫޢުތަކަށް ދައުލަތުގެ ބަޖެޓުން 900 މިލިއަން ރުފިޔާއަށްވުރެ ގިނަ ފައިސާ ޚަރަދުކުރާނެ ކަމަށް ސަރުކާރުން ވަނީ ބުނެފަ އެވެ.
މި މަޝްރޫއުތައް ހަވާލު ކުރުމަށް ބުދަ ދުވަހު ކުރިއަށްދިޔަ ރަސްމިއްޔާތުގައި 23 ރަށެއްގެ ފެނުގެ ނިޒާމު ގާއިމްކުރަން ވަނީ ހަވާލުކޮށްފަ. މީގެ އިތުރުން 16 ރަށެއްގެ ނަރުދަމާ ގާއިމް ކުރުމަށް ވަނީ ހަވާލުކޮށްފައިވެ އެވެ.
23 ރަށެއްގައި ފެނާއި ނަރުދަމާ ގާއިމްކުރުމުގެ އެއްބަސްވުމުގައި ސޮއިކުރުމުގެ ރަސްމިއްޔާތުގެ ތެރެއިން
މިރަސްމިއްޔާތުގައި ވާހަކަފުޅު ދައްކަވަމުން ރައީސް އިބްރާހިމް މުހައްމަދު ޞާލިހު ވިދާޅުވީ މި 5 އަހަރަކީ އެންމެ ސާފު ޠާހިރު 5 އަހަރަށް ހަދާނެކަމަށް ވިދާޅުވެ ވެލެއްވި ވައުދު ފުއްދުމުގެ ބަނދަރަށް ދިއުމަށް ދުވެލި ހަރުކުރެވިފައިވާކަމަށެވެ. އެމަނިކުފާނު ވަނީ މިއީ ބުރަ މަސައްކަތެއްކަމަށް ފާހަގަކުރައްވައި ކުރީ ސަރުކާރުތަކަށާއި ވެރިންނަށް ޝުކުރު އަދާކުރައްވައިފަ އެވެ. އެމަނިކުފާނު ވިދާޅުވީ އޭރު މިކަން ފަށާފައި ނުވިނަމަ މިއަދު އިތުރު ތަކުލީފެއް އުފުލަން ޖެހުނީސް ކަމަށެވެ. އެހެންނަމަވެސް ސުމަކުން ފަށަން ޖެހުނު ނަމަވެސް އެކަން ކުރެއްވީސްކަމަށް ރައީސް ވިދާޅުވި އެވެ.
"ސުމަކުން ފަށަން ޖެހުނުނަމަވެސް، މިކަމަކީ އަޅުގަނޑުމެން ދޫކުރާނެ ކަމެއް ނޫން. ސަބަބަކީ ހަމަ ޙަޤީޤަތުގައިވެސް ތަރައްޤީގެ ވާހަކަ ދައްކަން ފަށަން ޖެހޭނީ، ގައިން ތާހިރުވެ ތިބެގެން ކަމަށްވާތީ." ރައީސް ވިދާޅުވި އެވެ.
ރައީސް ވިދާޅުވީ ސައިޒުން ކިތަންމެ ކުޑަޔަސް އަދި ބޮޑަސް ނުވަތަ މީހުން ގިނަޔަސް މަދަސް ސަރުކާރުން ތަރައްގީ ގެންނާނެ ކަމަށެވެ. ރައީސް ވިދާޅުވީ އަސާސީ ކަންކަން މިނޫނަސް ރާއްޖޭގައި ފުރިހަމަކުރަންޖެހޭ އެބަ ހުރިކަމަށެވެ. ސަރުކާރުން އެކަންކަންވެސް ރައްޔިތުންނަށްޓަކައި ކޮށްދެމުން ދާނެކަމަށް ރައީސް ޞާލިހުގެ ވާހަކަފުޅުގައި ވިދާޅުވި އެވެ.
