ރާއްޖޭގެ ރަށްތަކަށް ހުޅުވާލައިގެން ބާއްވާ އެންމެ ބޮޑު ފުޓްސަލް މުބާރާތް، ސޮނީ ސްޕޯޓްސް ގޯލްޑަން ފުޓްސަލް ޗެލެންޖު 2022 ގެ ޕްލެޓިނަމް ސްޕޮންސަރަކަށް އުރީދޫ މޯލްޑިވްސް ހަމަޖައްސައިފިއެވެ.
އުރީދޫއަކީ މިއަހަރުގެ މުބާރާތުގެ ޕްލެޓިނަމް ސްޕޮންސަރުކަން މިއަދު އިއުލާން ކޮށްފައިވާ އިރު، އެއްބަސްވުމުގައި އުރީދޫގެ ފަރާތުން ސޮއިކުރެއްވީ ޗީފް ކޮމާޝަލް އޮފިސަރު (ސީ.ސީ.އޯ) ހުސެއިން ނިޔާޒެވެ. ގޯލްޑަން ފުޓްސަލް އެސޯސިއޭޝަންގެ ފަރާތުން އެއްބަސްވުމުގައި ސޮއިކުރީ، އެ ޖަމިއްޔާގެ ރައީސް ރިލްވާން މޫސާއެވެ.
އެއްބަސްވުމާއެކު އުރީދޫން ބުނީ ގޯލްޑަން ފުޓްސަލް ޗެލެންޖްގެ ޕްލެޓިނަމް ޕާޓްނަރެއްގެ ގޮތުގައި ބައިވެރިވުމަކީ އެ ކުންފުންޏަށް ލިބޭ ފަހުރެއް ކަމަށާއި، ގޯލްޑަން ފުޓްސަލް ޗެލެންޖަކީ ރާއްޖޭގައި ބޭއްވޭ އެންމެ ވާދަވެރި އެއް ފުޓްސަލް މުބާރާތް ކަމަށެވެ. އޭގެ އިތުރުން މުބާރާތުގައި ރާއްޖޭގެ އެކި ކަންކޮޅުތަކުގެ ހުނަރުވެރި ފުޓްސަލް ކުޅުންތެރިން ފެނިގެންދާ ކަމަށް އުރީދޫން ބުނެފައިވެއެވެ.
ނުވަދިހަ އެއްޓީމަކުން ވާދަކުރާ ގޯލްޑަން ފުޓްސަލް ޗެލެންޖު މިމަހުގެ 19 ވަނަ ދުވަހު ހުޅުމާލޭ ރެހެންދި ފުޓްސަލް ދަނޑުގައި ފެށުމަށް ވަނީ ނިންމާފައެވެ.
މިއަހަރުގެ މުބާރާތުގައި ޖުމްލަ 177 މެޗު ކުޅޭނެއެވެ. އޭގެ ތެރެއިން ފުރަތަމަ، އަތޮޅު ބުރު ކުޅޭ އިރު، ކޮންމެ އަތޮޅު ބުރެއްވެސް ކުޅޭނީ ލީގު އުސޫލުންނެވެ. އަތޮޅު ބުރުގައި ޓީމުތައް ބައިވެރިވި އަދަދަށް ބަލައި ގުރޫޕް ބަހަން މިފަހަރުވެސް ނިންމާފައިވާ އިރު، އަތޮޅު ބުރުގައި ފަސް ޓީމަށްވުރެ މަދުން ބައިވެރިވެފައިވާ އަތޮޅު ތަކުގައި ކުޅޭނީ ލީގު އުސޫލުންނެވެ.
އެހެން ނަމަވެސް ހަ ޓީމަށްވުރެ ގިނައިން ބައިވެރިވެފައިވާނަމަ އެ އަތޮޅެއްގެ މެޗުތައް ކުޅޭނީ ދެ ގުރޫޕަކަށް ބަހާލައިގެންނެވެ. ދެ ގުރޫޕުގެ އެއް ވަނަވެސް ޒޯން ބުރަށް ދާއިރު، އަތޮޅު ޗެމްޕިއަން ޓީމު ހޮވަން ކުޅޭނީ ފައިނަލް މެޗެކެވެ.
ސޮނީ ސްޕޯޓްސް ގޯލްޑަން ފުޓްސަލް މުބާރާތުގައި މާލެ އަދި ފުވައްމުލަކު ސިޓީ ފިޔަވައި ކޮންމެ ރަށަކުންވެސް އެރަށަކަށް ނިސްބަތްވާ އެއް ޓީމު މުބާރާތުގައި ބައިވެރިކުރުމަށް ފުރުސަތު ދީފައިވެއެވެ. މާލެ އާއި ފުވައްމުލަކުގެ ކޮންމެ އަވަށަކަށް ޓީމެއް ބައިވެރިކުރުމަށް ވަނީ ފުރުސަތު ދީފައެވެ.
މުބާރާތުގެ ޓައިޓަލް ސްޕޮންސަރަކަށް މިފަހަރުވެސް ސޮނީ ސްޕޯޓްސް ހަމަޖައްސާފައިވާ އިރު، މިފަހަރުގެ މުބާރާތުގެ އޮފިޝަލް އޮންލައިން މީޑިއާ ޕާޓްނަރަކީ "ވަން" އޮންލައިންނެވެ. މުބާރާތުގެ ކަވަރޭޖް "ވަން" އިން ތަފާތު ފޯރިއެއްގައި ގެނެސް ދިނުމަށް ވަނީ ނިންމައިފައެވެ. ގޯލްޑަން ފުޓްސަލް ޗެލެންޖަށް ޓީމުތަކުން ވަރުގަދައަށް ތާއްޔާރުވަމުން އަންނައިރު، މުބާރާތުގެ އެންމެފަހުގެ ޗެމްޕިއަނުންނަކީ ތ. ތިމަރަފުއްޓެވެ.
