ހައިކޯޓުން ނެރެފައިވާ އަމުރެއްގެ ދަށުން މީހަކު ބަންދުކޮށްފައި ވަނިކޮށް، ހައިކޯޓުގެ އަމުރު ސަސްޕެންޑް ކުރުމަށްފަހު އެ ނިންމުމާ ގުޅޭގޮތުން ނޫސްބަޔާން ނެރުނު މެޖިސްޓްރޭޓްގެ މައްސަލަ ބެލުމަށް ޖުޑިޝަލް ސާވިސް ކޮމިޝަނުން ނިންމައިފިއެވެ.
އެކޯޓުން ބަލަން ނިންމީ ސ. ހިތަދޫ މެޖިސްޓްރޭޓް ކޯޓުގެ މެޖިސްޓްރޭޓް ރަދީޢުއްދީން އަޙްމަދުގެ މައްސަލައެވެ. އެމައްސަލައަކީ 98 ކިލޯގެ މަސްތުވާތަކެތި ކަނޑުމަގުން ރާއްޖެއަށް ގިނަ އަދަދެއްގެ މަސްތުވާތަކެތި އެތެރެކުރުމުގެ ދައުވާލިބޭ މީހަކު ހައި ކޯޓުގެ އަމުރެއްގެ ދަށުން ޝަރީއަތް ނިމެންދެން ބަންދުކޮށްފައި ހުއްޓާ ސ. ހިތަދޫ ކޯޓުން އެ އަމުރު ސަސްޕެންޑްކޮށް، އެ މީހާ ދޫކޮށްލަން އަމުރު ނެރުއްވި މައްސަލައެވެ. އެ ނިންމުން ދިފާއުކޮށް، އެ ކޯޓުން ނޫސް ބަޔާނެއް ވެސް ނެރުނެވެ.
ޖޭއެސްސީން ބުނެފައިވަނީ ސ.ހިތަދޫ މެޖިސްޓްރޭޓް ކޯޓުގެ މެޖިސްޓްރޭޓް ރަދީޢުއްދީން އަޙްމަދު މީހެއްގެ ބަންދާމެދު ގޮތެއް ނިންމުމުގައާއި އެ ނިންމުމާ ގުޅޭ ގޮތުން ނޫސްބަޔާނެއް ނެރުމުގައި ފަނޑިޔާރުންގެ ސުލޫކީ މިންގަނޑާ ޚިލާފަށް ޢަމަލުކޮށްފައިވާކަމަށް ބެލެވޭތީ މެޖިސްޓްރޭޓް ރަދީޢުއްދީން އަޙްމަދުގެ ސުލޫކީ މައްސަލައެއް ތަޙުޤީޤުކުރުމަށް ނިންމާފައިވާކަމަށެވެ.
އެ މައްސަލަ ތަޙްޤީޤުކުރުމަށް ތަޙްޤީޤު ކޮމިޓީއެއްވެސް ކޮމިޝަނުން ވަނީ އެކުލަވާލާފައެވެ.
ކޯޓުތަކާ ބެހޭ ގާނޫނުގައިވާ ގޮތުން މަތީ ކޯޓެއްގެ ނިންމުމެއް ބާތިލްކުރުމާއި ސަސްޕެންޑް ކުރުމުގެ ބާރަކީ ދަށު ކޯޓަށް ލިބިގެންވާ ބާރެއް ނޫނެވެ. ދަށު ކޯޓަށް އޮތް ގޮތަކީ މަތީ ކޯޓުގެ ނިންމުންތަކާ އެއްގޮތަށް އަމަލުކުރުމެވެ. މިމައްސަލަ އިސްތިއުނާފު ކުރުމަށް ޕީޖީންވެސް ވަނީ ނިންމާފައެވެ.
