އެމްޑީޕީގެ ޗެއާޕާސަން ކަމަށް ވާދަކުރައްވާ އިކޮނޮމިކް މިނިސްޓަރު ފައްޔާޒު އިސްމާއީލް، އޭނާގެ ކެމްޕެއިނާ ގުޅޭގޮތުން ކުރެއްވި ޓްވީޓެއް ރައީސް އޮފީހުގެ އޮފިޝަލް ޓްވިޓާ އެކައުންޓުން ރިޓްވީޓް ކުރެވުނީ އޮޅުމެއްގެ ތެރެއިން ކަމަށް އެ އޮފީހުން ބުނެފިއެވެ.
ރައީސް އޮފީހުން އޮޅިގެން ރިޓްވީޓް ކުރެވުނު ކަމަށް ބުނާ ޓްވީޓަކީ ފައްޔާޒް މ.އަތޮޅަށް ރަށާއި ފ.އަތޮޅަށް ކުރެއްވި ކެމްޕޭން ދަތުރު ނިންމާލެއްވުމަށް ފަހުގައި ކުރެއްވި ޓްވީޓެކެވެ. ފައްޔާޒްގެ ޓުވީޓްގައި ވިދާޅުވެފައި ވަނީ މުލަކު އަދި ނިލަންދެ އަތޮޅަށް ކުރެއްވި ކެމްޕޭން ދަތުރުގައި ދެއްވި މެހެމާންދާރީއަށް ޝުކުރު ދަންނަވާ ކަމަށެވެ. ޕާޓީގެ ހިންގުން އެހެން މަރުޙަލާ އަކަށް އުފުލާލަން މެންބަރުން އެދޭ ކަމަށާއި އިރާދަކުރެއްވިއްޔާ އެކަން އެގޮތަށް ވާނެ ކަމަށް ވެސް ރައީސް އޮފީހުން ރީޓްވީޓް ކުރި ޓްވީޓްގައި ފައްޔާޒް ވިދާޅުވެފައިވެއެވެ.
މިކަމާއި ގުޅިގެން ރައީސް އޮފީހުން ބުނީ އެއީ އޮޅިގެން ކުރެވުނު ޓުވީޓެއް ކަމަށެވެ. އަދި އެކަމަށް މައާފަށް އެދޭ ކަމަށެވެ. ރައީސް އޮފީހުގެ ސޯޝަލް މީޑިއާ އަދި ވެބްސައިޓްތަކުން އެއްވެސް ކެންޑިޑޭޓަކު އެންޑޯޒްކޮށް އެއްވެސް މީހެއްގެ ކެމްޕޭން ހަރަކާތް ނުވަތަ ޕާޓީތައް އެންޑޯޒް ކުރަން މަސައްކަތް ނުކުރާ ކަމުގައިވެސް ރައީސް އޮފީހުން ވަނީ ބުނެފައެވެ.
އަދި މިފަދަ އެހެންކަމެއް ވިޔަ ނުދިނުމަށްޓަަކައި ފިޔަވަޅުތައް އިތުރަށް ހަރުދަނާކޮށްފައިވާ ކަމަށް ވެސް ރައީސް އޮފީހުން ބުނެއެވެ.
އެމްޑީޕީގެ އެތެރޭގެ އިންތިޚާބުގައި ޗެއާޕާސަން ކަމަށް ވާދަކުރައްވަނީ ފައްޔާޒުގެ އިތުރުން މާފަންނު އުތުރު ދާއިރާގެ މެމްބަރު އިމްތިޔާޒު ފަހުމީ އެވެ. އެމްޑީޕީގެ ޗެއާޕާސަންގެ އިންތިޚާބު ރޯދައިގައި ބާއްވަ ކުރިން ނިންމާފައިވާ ނިންމުން އެމްޑީޕީގެ ގައުމީ މަޖިލީހުން ވަނީ ބަދަލު ކޮށްފައެވެ. ޗެއާޕާސަން އިންތިޚާބު ފަސްކުރަން ފާސްކޮށްފައިވަނީ މެއި މަހުގެ 14 ވަނަ ދުވަހަށެވެ.
