ބީއެމްއެލް އިސްލާމިކުން ބިޒްނަސް ކަސްޓަމަރުންނަށް ހާއްސަކޮށް މުޅިން އާ ޕޭމަންޓް ސޮލިއުންޝަނެއްގެ ގޮތުގައި މާސްޓާކާޑު ބިޒްނަސް ޑެބިޓް ކާޑު މިއަދު ތައާރަފުކޮށްފިއެވެ.
ބީއެމްއެލުން ބުނީ އަލަށް ތައާރަފު ކުރި ކާޑުން ބިޒްނަސް އެކައުންޓް ބޭނުންކުރުމާއި ވިޔަފާރީގެ ހަރަދުތައް ބެލެހެއްޓުމާއި އަދި ނަގުދު ފައިސާއިން ކުރާ މުއާމަލާތްތައް ބަލަހައްޓަން ފަސޭހަވެގެންދާނެއެވެ.
މިކަމާ ގުޅޭ ގޮތުން ބީއެމްއެލްގެ ސީއީއޯ އަދި މެނޭޖިން ޑައިރެކްޓަރު ޓިމް ސޯޔާ ވިދާޅުވީ، އަލަށް ތައާރަފުކުރި މާސްޓާކާޑު، ބިޒްނަސް ޑެބިޓް ކާޑަކީ ވިޔަފާރިތަކުން ޑިޖިޓަލް ހިދުމަތްތައް ބޭނުންކުރުމަށް އެހީވެ އަދި ގިނަ ވިޔަފާރިތަކުން ބޭނުންވާ ފަދަ ކޭޝްލެސް ޕޭމަންޓުގެ ހިދުމަތް ބޭނުންކުރުމަށް މަގުފަހިކޮށްދިނުމަށް ބީއެމްއެލް އިސްލާމިކުން ތައާރަފްކުރި ހިދުމަތެއް ކަމަށެވެ.
ރާއްޖެއާއި ރާއްޖޭން ބޭރުގެ މުއާމަލާތް ކުރުމަށް މި ކާޑު ބޭނުންކުރެވޭނެއެވެ. ބީއެމްއެލުން ދޫކުރާ އެހެނިހެން ކާޑުތަކެކޭ އެއްފަދައިން އަލަށް ތައާރަފު ކުރި މާސްޓާކާޑު ބިޒްނަސް ޑެބިޓް ކާޑުގައިވެސް އެންމެ ފަހުގެ ސެކިއުރިޓީ ފީޗާސްތައް އެކުލެވެއެވެ.
