މާތް ﷲ މި އުންމުތަށް ލެއްވި އެންމެ ބޮޑު ނިއުމަތަކީ ކީރިތި ރަސޫލާ صلى الله عليه وسلم ކަމަށް ރައްޔިތުންގެ މަޖިލިހުގެ ރައީސް އަދި ކުރީގެ ރައީސް މުހައްމަދު ނަޝީދު ވިދާޅުވެއްޖެއެވެ.
މިއަދު ފާހަގަކުރާ ކީރިތި ރަސޫލާގެ އީދު މީލާދީއާ ގުޅިގެން ނަޝީދު ކުރެއްވި ޓްވީޓެއްގައި ވިދާޅުވީ މި އުންމަތަށް މާތް ﷲ ލެއްވި އެންމެ ބޮޑު ނިއުމަކީ ކީރިތި ރަސޫލާ(ސ) ކަމަށެވެ."ކީރިތި ރަސޫލާގެ އީދުމީލާދީ މި އުފާވެރި މުނާސަބަތުގައި ތަހުނިޔާ ދަންނަވާ ކަމަށް ވެސް ނަޝީދުގެ ޓްވީޓުގައި ވިދާޅުވި އެވެ.
ރަސޫލާ(ސ)ގެ އީދުމީލާދީއާއި ގުޅިގެން ކުރީގެ ރައީސް މައުމޫން އަބްދުލްގައްޔޫމް ވެސް ވަނީ ފޮނުއްވައިފައެވެ. މައުމޫން ކުރެއްވި ޓުވީޓެއްގައި ވިދާޅުވީ ރަސޫލުކަން ހަތިމް ކުރެއްވި މި އުންމަތުގެ މާތް ނަބިއްޔާ ދުނިޔޭގެ އަލިކަން ދެކެވަޑައިގެންނެވި ބަރަކާތްތެރި ދުވަހުގެ އިހްލާސްތެރި ތަހުނިޔާ މުޅި އިސްލާމީ އުންމަތަށް ފޮނުއްވާ ކަމަށެވެ.
ރައީސް އިބްރާހިމް މުހައްމަދު ސޯލިހު ވެސް ވަނީ ރަސޫލާގެ އީދުމީލާދީއާއި ގުޅިގެން މިއަދު ޚިތާބެއް ދެއްވާފައެވެ. ރައީސްގެ ހިތާބުގައި ވިދާޅުވީ ރަސޫލާގެ ޒިކުރާ އަޅުގަނޑުމެން އާކުރަނީ، އެކަލޭގެފާނުގެ ނަބަވީ ސީރަތުން ލިބިދޭ އިބްރަތްތެރި ފިލާވަޅުތަކުން، ދެދުނިޔެ ބާއްޖަވެރި ކުރުމުގެ މަތިވެރި މަގުސަދުގައި ކަމަށެވެ.
އެކަލޭގެފާނުގެ ސީރަތުން އަޅުގަނޑުމެން ލިބިގަންނަންވީ އެންމެ އަގުހުރި ފިލާވަޅަކީ، ތަފާތު ވިސްނުންތަކާއި ތަފާތު ހިޔާލުތަކުގެ މީހުންނާ އެކުގައި، އެއްބަނޑުއެއްބަފާ ގުޅުމެއްގެ ތެރޭގައި ދިރިއުޅުން ކަމަށާއި، އިސްލާމީ އުންމަތް އުފެދި ބިނާވެގެން އައީ އަދި އޭރު ދުނިޔޭގައި އޮތް ބާރުތަކާއި ހަޟާރަތްތަކުގެ މައްޗަށް އިސްލާމީ އުންމަތް ކާމިޔާބު ހޯދީ އެ ވަރުގަދަ ގުޅުމުގެ ސަބަބުން ކަމުގައިވެސް ވިދާޅުވި އެވެ.
