ސިޔާސީ އިސް މަގާމުތަކަށް އިތުރަށް މީހުން އައްޔަނު ނުކުރަން ނިންމަވާފައިވާކަމަށް ރައީސް ޑރ މުޙައްމަދު މުއިއްޒު ވިދާޅުވެއްޖެއެވެ.
ރިޔާސީ ބަޔާން އިއްވަވަމުން ރައީސް ވިދާޅުވީ، ސަރުކާރުގެ ހަރަދުތައް ކުޑަކުރުމުގެ ގޮތުން ފިޔަވަޅުތަކެއް އަޅަންޖެހިފައިވާކަމަށާއި އިސްތިސްނާ ހާލަތްތައް ފިޔަވައި ސިޔާސީ އިސް މަގާމުތަކަށް މީހުން އިތުރަށް އައްޔަނު ނުކުރަައްވަން އެމަނިކުފާނު ނިންމަވާފައިވާކަމަށެެވެ.
ރައީސް ވިދާޅުވީ، ދައުލަތުގެ މާލިއްޔާ އަށް ކުރިމަތިވެފައިވާ، އަދި ދަރަނި އިތުރުވާން ވެސް ދިމާވެފައިވާ މައިގަނޑު ސަބަބަކީ އާމްދަނީއާ އަޅާބަލާއިރު ސަރުކާރުގެ ހަރަދުތައް ބޮޑުތަނުން އިތުރުވުން ކަމަށެވެ.
އެއާ އެކު، ސަރުކާރު ހިންގުމުގެ ހަރަދުތައް ކުޑަކުރުމުގެ ފިޔަވަޅުތަކެއް އަޅަން މަޖުބޫރުވެފައިވާ ކަން އެ މަނިކުފާނު ހާމަކުރެއްވި އެވެ.
ސަރުކާރުގެ ހަރަދުތައް ކުޑަކުރުމުގެ ގޮތުން އިސްތިސްނާ ހާލަތްތައް ފިޔަވައި ސިޔާސީ އިސް މަގާމުތަކަށް މީހުން އިތުރަށް އައްޔަން ނުކުރަން އަޅުގަނޑު ނިންމާފައިވާ ވާހަކަ ދަންނަވާލަން
ރައީސް މުއިއްޒު ވިދާޅުވި އެވެ.
ދައުލަތުގެ މާލީ ހާލަތު ރަނގަޅުކޮށް، ދެމެހެއްޓެނިވި މިންގަނޑަކަށް ދަރަނި އަދި ފިސްކަލް ހާލަތު ގެނައުމަށް، އެ މަނިކުފާނު ވިދާޅުވި ގޮތުގައި މި ސަރުކާރުގެ އަމިއްލަ އިސްލާހީ ސިޔާސަތެއް އެކަށައަޅައި ހިންގާނެ ކަމަށެވެ.
ވެރިކަމާ ހަވާލުވެވަޑައިގަތުމަށް ފަހު، މި ސަރުކާރުގައި ސިޔާސީ މުވައްޒަފުންގެ އަދަދު 700 އަށް ވުރެ އިތުރު ނުކުރަން ރައީސް މުއިއްޒު އޮތީ ނިންމަވާފައި އެވެ.
އެކަމަކު، މިދިޔަ މަސް ނިމުނު އިރު، މި ސަރުކާރުގެ ޑެޕިއުޓީ މިނިސްޓަރުންގެ އަދަދު އެކަނިވެސް ވަނީ 150 އަށް ވުރެ މައްޗަށް އަރައިފަ އެވެ. މި ސަރުކާރުގައި މި ވަގުތު ވެސް 77 ސްޓޭޓް މިނިސްޓަރުން އެބަތިއްބެވެ. އެ ފެންވަރުގެ އިތުރު އަށް ބޭފުޅަކާއި ރައީސް އޮފީހުގައި ތިއްބެވި ސްޓޭޓް މިނިސްޓަރުންގެ ފެންވަރުގެ ހަ ބޭފުޅަކާއެކު، ސްޓޭޓް މިނިސްޓަރުންގެ އަދަދު ވެސް 91 އަށް އަރާފައިވެ އެވެ. މިނިސްޓަރުންގެ ފެންވަރުގެ ބޭފުޅުންގެ ގޮތުގައި 12 ބޭފުޅުން ރައީސް އޮފީހަށް އައްޔަނުކުރައްވާފައިވާއިރު، މިނިސްޓްރީތަކާއި އިދާރާތަކަށް 8 ބޭފުޅަކު ވަނީ މިނިސްޓަރުންގެ ފެންވަރުގައި އައްޔަނުކުރައްވާފައެވެ.
