ޖަލަށްލައި، އަބަދު ދެވޭ ނިސްބަތް މަޑުކޮށް، އެކިއެކި ކުށްތަކުގައި ތަހުގީގުގައި 'ވާނުވާ'ގައި ތިބޭ ތިބުން ނިމުމަކަށް ގެނައުމުގެ މަސައްކަތް މި މަހު ފައްޓަވާނެ ކަމަށް ރައީސް ޑރ. މުހައްމަދު މުއިއްޒު މިއަދު ވިދާޅުވެއްޖެއެވެ.
މިއަދުގެ ރިޔާސީ ބަޔާނުގައި ރައީސް ވަނީ މި މަސައްކަތަކީ އެމަނިކުފާނުގެ ރިޔާސީ ވައުދެއް ކަމަށާއި މަޖިލީހުގެ މި ފެށޭ ދައުުރުގެ ތެރޭގައި ގާނޫނަށް ގެންނަން ޖެހޭ އިސްލާހު ހުށަހަޅާނެ ކަމަށް ވިދާޅުވެފަ އެވެ.
"ތަހުގީގަށް ހައްޔަރުކޮށްފައި ވާނުވާ ގައި ބޭތިއްބުން ނިމުމަކަށް ގެނައުމުގެ މަސައްކަތް މި މަހު ފަށާނަން، އަދި ރައްޔިތުންގެ މަޖްލީހުގެ މި ފެށޭ ދައުރުތެރޭގައި ގާނޫނަށް އިސްލާހު ހުށަހަޅާނަން،" އެމަނިކުފާނު ވިދާޅުވި އެވެ.
ރައީސް ވިދާޅުވީ، ގާނޫނުތައް އެކަށައެޅުމުގައި ސަރުކާރުގެ އެންމެ ބޮޑު ސިޔާސަތަކީ ކުށް މަދުކުރުން ކަމަށެވެ. އަދި، ކުށް ކުރާ މީހުންނަށް ރަނގަޅު މަގު ދައްކައި، އަލުން މުޖުތަމައަށް ގެނައުމަކީ ސަރުކާރުގެ ސިޔާސަތުކަން އެ މަނިކުފާނު ފާހަގަކުރެއްވިއެވެ.
ސަރުކާރުން ގާނޫނަށް ގެންނާނެ އިސްލާހުތައް ފާހަގަކުރައްވަމުން ރައީސް އިތުރަށް ވިދާޅުވީ ޝަރުއީ ދާއިރާއަށް ސިޔާސީ ނުފޫޒު ވަނުމުގެ ފުރުސަތު ހަނިކުރުމަށް ޖޭއެސްސީ އެކުލެވޭގޮތް ގާނޫނީ ގޮތުން ބަދަލުކުރުމަށް ސަރުކާރުން މަޖިލީހަށް ބިލެއް ހުށަހަޅާނެ ކަމަށެވެ. ރައީސް ވިދާޅުވީ ސަރުކާރުން ހުށަހަޅަން ގަސްތުކުރާ ބައެއް ބިލް ތަކުގެ ތެރޭގައި ކަފާލާތުގެ ފުރިހަމަ ނިޒާމެއް ގާއިމުކުރުމަށް ބޭނުންވާ ބިލާއި، ޕްރިވެންޓިވް ހެލްތް ކެއަރ ބިލާއި، ނަފްސާނީ ދުޅަހެޔޮކަމާބެހޭ ބިލް އަދި ގެދޮރުވެރިކަމުގެ މިންގަނޑުތަކާބެހޭ ބިލް ހިމެނޭ ކަމަށެވެ.
އެ މަނިކުފާނު ވިދާޅުވީ، އެއްވެސް ބޭފުޅަކު ޝަރުއީ ދާއިރާއަށް ނުފޫޒު ފޯރުވާ ނަމަ ވަގުތުން ފިޔަވަޅު އަޅުއްވާނެ ކަމަށެވެ.
