ގެދޮރުވެރިޔާ ސްކީމްގެ ދަށުން މިދިޔަ ސަރުކާރުން ދޫކުރި 4،000 ފުލެޓު ލިބުނު މީހުންގެ ތެރެއިން 59.6 އިންސައްތަ މީހުންގެ ޝަރުތު ހަމަނުވާ ކަމަށާއި ބައެއް ފަރާތްތަކުގެ މައުލޫމާތު ފުށުއަރާ ކަމަށް އެންޓި ކޮރަޕްޝަން ކޮމިޝަން (އޭސީސީ)ން މިއަދު ބުނެފިއެވެ.
އޭސީސީން މިއަދު ބޭއްވި ނޫސްވެރިންގެ ބައްދަލުވުމެއްގައި ބުނީ، ތަހުގީގުގައި ޖުމުލަ 4،048 ފޯމު ބަލާފައިވާ ކަމަށާއި 4،000 ފުލެޓަށް ކުރިމަތިލީ މީހުންނަށް ޕޮއިންޓު ދިނުމުގައި އެއް ހަމައަކުން އަމަލުކޮށްފައިނުވާ ކަމަށެވެ. އަދި، ބައެއް އެޕްލިކެންޓުންނަށް އިތުރަށް ޕޮއިންޓު ދީފައިވާ ކަމަށާއި ބައެއް މީހުން ދީފައިވާ މައުލޫމާތު ވެސް ފުށުއަރައި ކަމަށް އޭސީސީން ބުންޏެވެ.
އެ ކޮމިޝަނުގެ ތަހުގީގު ޓީމުން ބުނީ، ފުލެޓު ލިސްޓުގައި ޝަރުތު ފުރިހަމަވެ، އެއްވެސް މައްސަލައެއް ފާހަގަކުރެވިފައިނުވަނީ އެންމެ 20.7 އިންސައްތަ ފޯމުން ކަމަށެވެ. އަދި، ޝަރުތު ފުރިހަމަވި ނަމަވެސް މައުލޫމާތު ފުރިހަމަނުވާ ފޯމުތަކުގެ ނިސްބަތް 19.7 އިންސައްތައަށް އަރައި ކަމަށް އޭސީސީން ބުންޏެވެ.
އެގޮތުން، ފުލެޓަށް ޝަރުތުހަމަވާ ކަމަށް ކަނޑައަޅާފައިވާ އެޕްލިކެންޓުންގެ ތެރޭގައި މާލޭގައި މެދުނުކެނޑި ދިރިއުޅޭތާ 15 އަހަރުވީކަން ސާބިތުކުރަން ސައްހަ ނޫން ލިޔެކިޔުން ހުށަހެޅި މީހުން ވެސް ހިމެނޭކަން އެ ކޮމިޝަނުން ފާހަގަކުރިއެވެ. އަދި، ޕޯޓަލް މެދުވެރިކޮށް ދީފައިވާ މައުލޫމާތުގެ ސައްހަކަން ކަށަވަރު ކުރުމަކައިނުލާ ވެސް ބައެއް މީހުންނަށް ފުލެޓު ލިބޭ ކަމަށް ކަނޑައަޅާފައިވާ ކަމަށް އޭސީސީން ބުންޏެވެ. ޝަރުތު ހަމަނުވާ ފޯމުތަކުގެ ތެރޭގައި ގިނައީ އުސޫލުގެ ތިން ވަނަ ނަމްބަރުގެ (ނ)، އެއީ މާލޭގައި ދިރިއުޅެފައިވާ ފަރާތެއްކަން ސާބިތުކުރުމަށް ހަމައެކެނި ގޭގެ ލިޔުމެއް ނުވަތަ ރަށްރަށުގެ ކައުންސިލުގެ އިދާރާތަކުން ދޫކޮށްފައިވާ ލިޔުން ހުށަހަޅާފައިވާ ހާލަތުގައި އެ ލިޔުމަށް ބުރަދަންދީ ޝަރުތު ފުރިހަމަވާ ކަމަށް ކަނޑައަޅާފައިވާ ފޯމުތަކެއް ކަމަށް ވެސް އޭސީސީއިން ބޭއްވި ނޫސްވެރިންގެ ބައްދަލުވުމުގައި ބުނެފައި ވެ އެވެ.
އޭސީސީގެ ތަހުގީގު ޓީމުގައި ހިމެނިވަޑައިގަންނަވާ އޮފިޝަލް ވިދާޅުވީ، މާލޭގައި ވަޒީފާ އަދާކުރާކަން ސާބިތުކުރަން ކުންފުނި އުފެއްދި ތާރީޚަށް ވުރެ ކުރީގައި އެ ކުންފުނީގައި ވަޒީފާ އަދާކުރަމުންދާ ކަމަށް ބުނެ ވެސް ލިޔެކިޔުން ހުށަހަޅާފައި އޮތް ކަމަށެވެ.
އެހެންވެ، ގިނަ ބައެއްގެ ހައްގު ގެއްލުމުގެ އިހުތިމާލު އޮތް ކަމަށް ތަހުގީގުގައި ވަނީ ނިންމައިފައެވެ. އޭސީސީއިން ބުނީ އޭރުގެ ހައުސިން މިނިސްޓްރީން ޝަރުތު ހަމަނުވާ ބަޔަކަށް ފްލެޓް ދިނުމަށް ނިންމުމުގައި ވަކި ބަޔަކަށް ނާޖާއިޒު ފައިދާ ހޯދުމަށް މަސައްކަތް ކުރުން ފަދަ ކޮރަޕްޝަނުގެ އަމަލެއް ހިމެނޭ ކަން ނުވަތަ ނޫން ކަން ބެލުމަށް ވަކި ޖިނާއީ ތަހުގީގެއް ހިންގާނެ ކަމަށެވެ.
އަދި، ފޯމު ފުރިއިރު ދޮގު މައުލޫމާތު ފޯމުގައި ލިޔުނު މައްސަލާގައި ދައުލަތުގެ އިދާރާއަކަށް ދޮގު މައުލޫމާތު ދިން ކަމުގެ ތުހުމަތުތަކުގެ މައްސަލައެއް ގޮތަށް ފުލުހުންނާ ގުޅިގެން ތަހުގީގު ކުރެވޭނެ ކަމަށް އޭނާ ވިދާޅުވި އެވެ.
މީގެ އިތުރުން، ޕޮއިންޓު ދިނުމުގައި ހުރި މައްސަލަތަކުގެ ތެރޭގައި ހާއްސަ އެހީއަށް ބޭނުންވާ މީހަކު ބަލަމުން އަންނަ މީހެއް ކަމަށް ފޯމުގައި ނެތް ބައެއް މީހުންނަށް ވެސް އެ ބަޔަށް ޕޮއިންޓު ދީފައި ހުރި ކަމަށެވެ.
ފުލެޓުތައް ދޫކުރުމުގައި މައްސަލަ އުޅޭ ކަމަށް ބުނެ، އޭސީސީން ފެށި ޖިނާއީ ތަހުގީގާ ގުޅިގެން ގިނަ ދުވަސްތަކެއް ވަންދެން ފުލެޓު ދޫކުރުން މަޑު ޖެހިފައި އޮތުމަށް ފަހު މިދިޔަ ހަފުތާގައި އޭސީސީން ވަނީ ބައެއް ކަންތަކަކަށް ރިއާޔަތްކުރުމަށް ފަހު ފުލެޓު ދޫކުރުމުގެ މަސައްކަތް ކުރިއަށް ގެންދަން ހުއްދަ ދީފައެވެ.
ގެދޮރުވެރިޔާ ސްކީމުގެ ދަށުން ފްލެޓް ދޭން ހުޅުވާލުމާއެކު ހުށަހެޅި މީހުންގެ ތެރެއިން ޝަރުތު ހަމަވާ ކަމަށް މިދިޔަ އޯގަސްޓު 8 ގައި ނެރުނު ވަގުތީ ލިސްޓުގައި އޮތީ 15،046 މީހުންނެވެ. އޭރު ނިންމާފައި އޮތީ ފުރަތަމަ 4،000 ފްލެޓް ލިބޭނީ ޕޮއިންޓް ތަރުތީބުން އެންމެ ގިނަ ޕޮއިންޓު ލިބޭ މީހުނަށް ލިބޭ ގޮތަށެވެ.
ގެދޮރުވެރިޔާ ސްކީމުގެ ދަށުން އިއުލާން ކުރި 4000 ފުލެޓް ދިނުމުގެ މަސައްކަތް ކުރިއަށް ދަނިކޮށް އެކަން ހުއްޓުވީވެސް އޭސީސީންނެވެ. އެއީ ފްލެޓަށް އެދުނު ފަރާތްތަކަށް ޕޮއިންޓް ދިނުމުގައި ނުފޫޒުގެ ބޭނުން ކޮށްފައިވާ ކަމަށް ކުރި ތުހުމަތު ތަކަކާ ގުޅިގެންނެވެ.
