ސަރުކާރަށް މިވީ 11 ހަފުތާގެ ތެރޭ 5 ފަހަރަށް އަޅުގަނޑު ނޫސްވެރީންނާ ބައްދަލުކުރައްވައިފި ކަމަށާއި ނޫސްވެރިންނަށް ވެސް އަދި ރައްޔިތުންނަށް ވެސް އެމަނިކުފާނުގެ ސަރުކާރުގައި ފޮރުވާނެ ކަމެއް ނޯންނާނެ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.
ރައްޔިތުންގެ މަޖިލިސް މިއަހަރަށް ހުޅުވަން ބޭއްވި ޖަލްސާގައި ރައީސް މުއިއްޒު ފުރަތަމަ ފަހަރަށް އިއްވެވި ރިޔާސީ ބަޔާނުގައި އެމަނިކުފާނު ވިދާޅުވީ ސަރުކާރުގެ ހުރިހާ މަސައްކަތެއް ވެސް ކުރިއަށް ގެންދާނީ ދެފުށް ފެންނަ ގޮތަށް، ހާމަކަން ބޮޑުކޮށް ކަމަށެެވެ.
ރައީސް އޮފީހަށާއި ސަރުކާރުގެ އިދާރާތަކަށް ބައެއް މީޑިއާތަކަށް ނުވަދެވޭ ގޮތަށް ހަދާ "ބްލެކްލިސްޓެއް" މިސަރުކާރަކު ނޯންނާނެ ކަމަށް ވެސް ރައީސް ވިދާޅުވި އެވެ.
ސަރުކާރުގެ ވިސްނުމަކީ އަދި އުންމީދަކީ ވެސް މީޑިއާތަކާއި ރައްޔިތުންނާ ވީހައިވެސް ގާތުން މަސައްކަތްކުރުން ކަމަށް ވެސް އެމަނިކުފާނު ވިދާޅުވި އެވެ. މީޑިއާތަކަށް އޮފީސް ޖާގަ ލިބުން ދަތިވާތީ އެކަން ހައްލުކޮށްދޭން ހުޅުމާލޭގައި މީޑިއާ ވިލެޖެއް ގާއިމުކުރަން ސަރުކާރުން ނިންމާފައިވާ ކަމަށް ވެސް ވިދާޅުވި އެވެ.
ރައީސް ވިދާޅުވި ގޮތުގައި ސަރުކާރުގެ ހުރިހާ އިދާރާއަކުން ވެސް މީޑިއާ ޔުނިޓްތައް އުފައްދައި، ނޫސްވެރީންނަށް މައުލޫމާތު ފޯރުކޮށްދެ އެވެ. މުހިންމު ހުރިހާ ކަމަކާ ގުޅިގެން ސަރުކާރުގެ އިދާރާތަކުން ނޫސްވެރީންގެ ބައްދަލުވުންތައް ބާއްވާކަމަށް ވެސް ރައީސް ވިދާޅުވި އެވެ.
ސަރުކާރަށް މިވީ 11 ހަފުތާގެ ތެރޭ 5 ފަހަރަށް އަޅުގަނޑު ނޫސްވެރީންނާ ބައްދަލުކޮށްފިން. ސަރުކާރުގެ ހުރިހާ އިދާރާއަކުންވެސް މީޑިއާ ޔުނިޓުތައް އުފައްދައި، ނޫސްވެރީންނަށް މަޢުލޫމާތު ފޯރުކޮށްދޭ. މުހިންމު ހުރިހާ ކަމަކާ ގުޅިގެން ސަރުކާރުގެ އިދާރާތަކުން ނޫސްވެރީންގެ ބައްދަލުވުންތައް ބާއްވާ.
ރައީސް ވިދާޅުވީ އެމަނިކުފާނުގެ ވިސްނުންފުޅަކީ އުންމީދަކީ މީޑިއާތަކާއި އަދި ރައްޔިތުންނާ ވީހާވެސް ގާތުން ސަރުކާރުން މަސައްކަތް ކުރުން ކަމަށެވެ.
މި ފެބުރުވަރީ މަހުގެ ފުރަތަމަ ދުވަހުން ފެށިގެން، މަދުވެގެން ކޮންމެވެސް އެއް ރައްޔިތެއްގެ ވީޑިއޯ ސުވާލަކަށް ސީދާ އެމަނިކުފާނު ކޮންމެ ދުވަހަކު ޖަވާބުދެއްވަން ފައްޓަވާފައިވާ ކަމަށާއިކުރިއަށް މި އޮތް މަހެއްހާ ދުވަހުގެ ތެރޭގައި، ރައްޔިތުން ބޭނުންވާ ކަންކަން، ސީދާ އެމަނިކުފާނަށް ހުށަހެޅޭގޮތަށް ޚާއްޞަ ޕޯޓަލެއްވެސް ރައީސުލްޖުމްހޫރިއްޔާގެ އޮފީހުން ހުޅުވައިލާނެ ކަމަށް ވިދާޅުވި އެވެ.
ރައްޔިތުންގެ ހުށަހެޅުންތަކަށް އިރާދަކުރެއްވިއްޔާ ސީދާ އަޅުގަނޑު ޖަވާބުދާރީވާނަން. އަދި އަޅުގަނޑުގެ އުންމީދަކީ، ރައްޔިތުންގެ އެކި ޖަމާޢަތްތަކާ ބައްދަލުކުރުމާއި، ރައްޔިތުންގެ ގޭގެއަށާއި ޢާއިލާތަކަށާއި، ރާއްޖޭގެ އެކި ރަށްރަށަށް އަޅުގަނޑު ޒިޔާރަތްކުރުން.
ރައީސް މިއަދު ވިދާޅުވީ އެމަނިކުފާނު ބޭނުންފުޅުވެލައްވަނީ ރައްޔިތުންގެ ޚާދިމެއްގެ ގޮތުގައި މަޤާމުގެ ވާޖިބު އަދާކުރައްވަން ކަމަށެވެ.
