ޑިރެކްޓަރ ޖެނެރަލް އޮފް ޒަކާތު މަގާމަށް މުވައްޒަފަކު ހޯދުމަށް އިސްލާމީ ކަންތައްތަކާއި ބެހޭ ވުޒާރާއިން އިއުލާންކޮށްފި އެވެ.
ރައީސް އޮފީހުން ބުނި ގޮތުގައި މޯލްޑިވްސް ޒަކާތު ހައުސްގެ ނަމުގައި ސަރުކާރުގެ އިދާރާއެއް ގާއިމުކުރީ ރާއްޖޭގެ ޒަކާތުގެ ނިޒާމު ހަރުދަނާކުރުމުގެ މަސައްކަތާއި، ޒަކާތުގެ ނަފާ އޭގެ ބެހެނިވެރިންނަށް ފުޅާ ދާއިރާއެއްގައި ލިބޭނެގޮތަށް ޒަކާތު ފަންޑު ތަރައްގީ ކުރުމުގެ މަސައްކަތްކުރުމުގެ ބޭނުމުގައެވެ.
އެ ވުޒާރާއިން މިއަދު ކުރި އިއުލާންގައިވާގޮތުން އެ މަގާމަށް ހޮވާ މުވައްޒަފަށް ފުރަތަމަ ވަޒީފާ ހަމަޖެއްސޭނީ އެއް އަހަރާއި 11 މަހަށެވެ. އަދި މި މުއްދަތު ހަމަވުމުން މަސައްކަތުގެ ފެންވަރުބަލައި ރަނގަޅުނަމަ، ވަޒީފާ ދާއިމީ ކުރެވިދާނެ ކަމަށް ބުނެފައި ވެއެވެ.
އެ މަގާމަށް ހޮވޭ މުވައްޒަފުގެ ބޭސިކް މުސާރައަކީ 28،500ރ އެވެ. އަދި ލިވިންގ އެލަވަންސް 12،500ރ. ސަރވިސް އެލަވަންސް 2،500ރ އާއި އެކު ޖުމްލަ މަހެއްގެ މައްޗަށް 43،500ރގެ މުސާރައެއް ލިބިގެން ދާނެއެވެ.
މި މަގާމުގެ ޝަރުތުތަކުގެ ތެރޭގައި އިސްލާމީ އިލްމުތަކުގެ ރޮނގަކުން ދަށްވެގެން ރާއްޖޭގެ ގައުމީ ސަނަދުތަކުގެ އޮނިގަނޑުގެ ލެވެލް 10 ގެ ސަނަދެއް ހާސިލުކޮށްފައިވުމާއެކު ދީނީ ދާއިރާގައި އަދި ޒަކާތާ ގުޅޭ މަސައްކަތުގައި މަދުވެގެން ފަސް އަހަރު ދުވަހު މަސައްކަތްކޮށްފައިވާ، އަރަބި އަދި އިނގިރޭސި ބަސް ރަނގަޅަށް ދަންނަ ފަރާތެއްކަމުގައިވުން ހިމެނެއެވެ.
މި މަގާމަށް އެދި ހުށަހަޅަންޖެހޭ ވަޒީފާއަށް އެދޭ ފޯމާއި ލިޔުންތައް ހުށަހަޅާނީ އަންނަ ބުރާސްފަތި ދުވަހުގެ މެންދުރު 14:00ގެ ކުރިންނެވެ.
"މޯލްޑިވްސް ޒަކާތު ހައުސް" ގެ ނަމުގައި އިދާރާއެއް އުފެއްދެވީ ޑިސެމްބަރު މަހުގެ 18 ވަނަ ދުވަހެވެ. އެ އިދާރާ އުފައްދަވައި އެ ތަނަކީ އިސްލާމީ ކަންތައްތަކާއި ބެހާ ވުޒާރާގެ ދަށުން ހިންގާ ތަނެއްގެ ގޮތުގައި ހަމަޖައްސައިފައެވެ.
