މިދިޔަ ސަރުކާރުގެ ބިންވެރިޔާ ސްކީމުގެ ދަށުން ގޯތި ލިބުނު މީހުންގެ ތެރެއިން ގޯއްޗާ ހަވާލު ނުވާ މީހުންނަށް އަންނަ ބުދަ ދުވަހުން ފެށިގެން ގޯތީގެ ރަޖިސްޓަރީ އާއި ގޯތި ލިބުނު ކަމުގެ ލިޔުން ދޫކުރަން ހަމަޖެހިފައިވާ ކަމަށް ހައުސިން މިނިސްޓްރީން މިއަދު ބުނެފިއެވެ.
އެ މިނިސްޓްރީން ނެރުނު ބަޔާނުގައި ބުނެފައި ވަނީ ސޮއި ކުރުމަށް ދާންޖެހޭ ފަރާތްތަކަށް ހާޒިރުވާންޖެހޭ ގަޑިއާއި ތާރީހު ހައުސިން މިނިސްޓަރީން ތަރުތީބު ކުރާ ތާވަލަކާ އެއްގޮތަށް އަންގަމުން ގެންދާނެ ކަމަށް އެ ބަޔާނުގައި ބުނެފައިވެ އެވެ.
ގޯތި ލިބުނު ކަމުގެ ލިޔުމާއި ގޯތި ރެޖިސްޓްރީ ހަވާލު ކުރުން ކުރިއަށް ގެންދާނީ އަންނަ ބުދަ ދުވަހުން ފެށިގެން ރަސްމީ ކޮންމެ ދުވަހެއްގެ މެންދުރު ފަހުގެ 2 އިން ފެށިގެން އިރުއޮއްސި 6 ޖެހުމާ ދެމެދު އެ މިނިސްޓްރީގައި ކަމަށް ވެސް އެމިނިސްޓްރީން ބުނެ އެވެ.
އެ މަސައްކަތް ކުރިއަށް ގެންދާނީ އެ މިނިސްޓްރީން އަންގާ ތަރުތީބަކުން ކަމަށް ވެސް ބަޔާނުގައިވެއެވެ. އެގޮތުން އެ ދުވަހަކު ސޮއި ކުރާނޭ މީހުން ހާޒިރުވާނެ ގަޑިއާއި ތާރީޚު އެ މިނިސްޓްރީން އެ މީހަކަށް އަންގައި ތަރުތީބަކުން ތާވަލު ކުރެވޭނެ ކަމަށް ވެސް އެ މިނިސްޓްރީން ވަނީ ބުނެފައެވެ.
މިކަމާ ގުޅޭ އިތުރު މައުލުމާތު ހޯދުމަށް އެ މިނިސްޓްރީގެ ހޮޓްލައިނަށް ގުޅުމަށް އެ މިނިސްޓްރީން އެދެއެވެ.
ބިންވެރިޔާ ސްކީމްގެ ފުރަތަމަ ފިޔަވަހީގެ ދަށުން، 18،955 މީހުން ގޯއްޗަށް ޝަރުތު ހަމަވާއިރު، ޖުމުލަ 9،003 ގޯތި ދޫކުރަން ވަނީ ނިންމައިފައެވެ. އެ ސްކީމްގެ ތެރެއިން މާލޭ މީހުންނަށް ހުޅުމާލޭންނާއި ގުޅީފަޅުންނާއި ގިރާވަރުފަޅުން ވެސް ގޯތި ދޫކުރަން ވަނީ ހަމަޖެހިފައެވެ.
