އިންތިޚާބު ފަސްކުރުމަށް ފާސްކުރި ބިލް ވަގުތުން ތަސްދީޤު ކުރުމަށް އެމްޑީޕީގެ ޗެއާޕަރސަން ފައްޔާޒު އިސްމާއިލް ގޮވާލައްވައިފިއެވެ.
"އެކްސް" ގައި ކުރެއްވި ޕޯސްޓެއްގައި ފައްޔާޒު ވިދާޅުވީ އިންތިޚާބުތައް ބާއްވަންވާނީ ރައްޔިތުންގެ ބައިވެރިވުން ބޮޑު ވާނޭ ގޮތް ބަލައިގެން ކަމަށެވެ.
ރައްޔިތުންގެ ވަކީލުން ހޮވުމުގެ އިންތިޚާބު ރަމަޟާން މަހު ބޭއްވުމުން އެ ދަތިކުރެވެނީ ވޯޓުދިނުމުގެ އަސާސީ ޙައްޤުގެ ބޭނުންކުރުމަށް ކަމަށާއި އިންތިޚާބު ފަސްކުރުމަށް ފާސްކުރި ބިލް ވަގުތުން ތަސްދީޤުކުރަންޖެހޭ ކަމަށް ވިދާޅުވިއެވެ.
ރައްޔިތުންގެ މަޖިލީހުގެ އިންތިހާބު ފަސް ކުރަން މަޖިލީހުން ފާސްކުރީ މީގެ ހަފްތާއެއް ކުރިންނެވެ.
އިލެކްޝަންސް ކޮމިޝަނުން މަޖިލިސް އިންތިހާބު ބޭއްވުމަށް ނިންމާފައިވަނީ އަންނަ މާޗް މަހުގެ 17 ވަނަ ދުވަހުއެވެ. ނަމަވެސް އެއީ ރޯދަމަސްތެރެ ކަމަށް ވުމުން ރޯދަ މަސް ނިމިގެން 10 ދުވަސް ފަހުން އިންތިހާބު ބޭއްވުމަށް މަޖިލީހުން ވަނީ ފާސްކޮށްފަ އެވެ.
މަޖިލީހުގެ ނިންމުމާއި އެއްގޮތަށް އިންތިހާބު ފަސް ކުރަން ސިޔާސީ ޕާޓީތަކުންވެސް ދަނީ ގޮވާލަމުންނެވެ.
