މިނިސްޓްރީ އޮފް އެގްރިކަލްޗާ އެންޑް އެނިމަލް ވެލްފެއާގެ ސްޓޭޓް މިނިސްޓަރު ހުސައިން އިސްމާއީލް މަގާމުން ވަކިކުރައްވައިފި އެވެ.
ހުސައިން އިސްމާއީލް ހަމައެވްވީއަށް ވިދާޅުވީ ރޭ ވަކިކުރިކަން ރައީސް އޮފީހުން އަންގާފައިވާ ކަމަށެވެ. ވަކިކުރި ސަބަބެއް އަންގާފައި ނުވާކަމަށާއި ރައީސަށް ލިބިގެންވާ ބާރުގެ ދަށުން ވަކިކުރީކަމަށް، ވަކިކުރިކަން އެންގި ލިޔުމުގައިވާ ކަމަށް އޭނާ ވިދާޅުވި އެވެ.
މޯލްޑިވްސް ނެޝަނަލް ޕާޓީ (އެމްއެންޕީ)ގެ ނައިބް ރައީސެއްގެ ގޮތުގައި ހުންނެވި ހުސައިން އިސްމާއީލް ސްޓޭޓް މިނިސްޓަރުގެ މަގާމުން ވަކިކުރެއްވިއިރު އެ މިނިސްޓްރީގެ ވަޒީރު ޑރ. އައިޝަތު ރަމީލާ އާލާސްކަންފުޅާ އުޅުއްވާތީ މިދިޔަ ދުވަސްތަކުގައި މިނިސްޓްރީ ހިންގުމުގައި އެންމެ އިސްކޮށް އުޅުއްވީ ހުސައިން އިސްމާއީލް އެވެ.
"މިނިސްޓަރަކަށް ވެސް އެނގިވަޑައިނުގަންނަވާ ވަކިކުރެއްވި ސަބަބެއް." ހުސައިން އިސްމާއިލް ވިދާޅުވި އެވެ.
އެމްއެންޕީއަށް ނިސްބަތްވެވަޑައިގަންނަވާ ހުސައިން އިސްމާއިލް ވަކި ކުރެއްވި އިރު މަޖިލިސް އިންތިޚާބުގައި އެޕާޓީގެ ރައީސް މުހައްމަދު ނާޒިމް ވާދަކުރައްވާ ދާއިރާއަށް ވާދަނުކުރަން ސަރުކާރު ހިންގާ މައިޕާޓީ ޕީއެންސީއިން ވަނީ ނިންމާފަ އެވެ. ނިމިދިޔަ ރިޔާސީ އިންތިޚާބުގެ ދެވަނަ ބުރުގައި އެމްއެންޕީއިން ތާއީދު ކުރީ ރައީސް ޑރ. މުހައްމަދު މުއިއްޒަށެވެ.
