އެކްޓަރު ޖޯން އަބްރަހަމް ލީޑް ރޯލުން ފެންނަ "ސަތުޔަމޭވަ ޖަޔަތޭ 2" ގެ ޝޫޓިންތައް ނިންމާލައިފި އެވެ.
މިދިޔަ އަހަރު ފެށި މި ފިލްމު ރިލީޒް ކުރަން ކުރިން އިއުލާން ކުރީ މިއަހަރުގެ މެއި މަހުގެ 13 ވަނަ ދުވަހު އެވެ. އެހެންނަމަވެސް ކޮވިޑްގެ ސަބަބުން އިންޑިއާ ލޮކްޑައުންކުރަން ނިންމުމާއިއެކު މިއަހަރުގެ ކުރީކޮޅަށް ތާވަލުކުރި ޝޫޓިންތައް ފަސްކުރި އެވެ. އަދި އޭޕްރީލް މަހުގެ ތެރޭގައި ފިލްމުގެ ޓީމުން ވަނީ ރިލީޒްކުރުން ފަސްކޮށްފައިވާކަން އިއުލާން ކޮށްފަ އެވެ.
މިދިޔަ ހަފްތާގެ ތެރޭގައި "ސަތުޔަމޭވަ ޖަޔަތޭ 2" ގެ ޝޫޓިން މުޅިން ނިންމާލާފައިވާއިރު ޕޯސްޓު ޕްރޮޑަކްޝަން މަސައްކަތްތައް މިހާރު ފަށާފައިވާކަމަށް ރިޕޯޓުތައް ބުނެ އެވެ. ފިލްމު ރިލީޒް ކުރާނެ ސީދާ ތާރީހެއް އިއުލާން ނުކުރި ނަމަވެސް ރިލީޒް ކުރުމުގެ އަމާޒު ހުރީ ސިނަމާގައި ކަމަށް ޓީމުން ބުނެ އެވެ.
އިންޑިއާގައި ކޮވިޑުގެ ހާލަތު އޮތް ގޮތުން ބޮލީވުޑްގެ ގިނަ ފިލްމުތައް ޑިޖިޓަލްކޮށް ރިލީޒް ކުރަން ދަނީ ނިންމަމުންނެވެ. މީގެ ސަބަބުން ފިލްމުތަކަށް ލިބެންޖެހޭ މިންވަރަށް އާމްދަނީ ނުލިބުމުގެ ކަންބޮޑުވުން އެބަ އޮތެވެ. އަދިވެސް އިންޑިއާގެ ހުރިހާ ސަރަހައްދެއްގައި ސިނަމާތައް ހުޅުވުމުގެ ހުއްދަ ނުދެ އެވެ. ކޮވިޑުގެ ހާލަތާއިއެކު ސިނަމާތައް ހުޅުވިނަމަވެސް ފިލްމު ބަލަން ދާ މީހުން މަދުވެދާނެ ކަމުގެ ބިރުވެސް އެބަ އޮތެވެ.
"ސަތުޔަމޭވަ ޖަޔަތޭ 2" ޑައިރެކްޓު ކުރީ މިލާޕް ޒަވޭރީ އެވެ. ފިލްމުގެ ލީޑް ރޯލުން ޖޯން ފެންނައިރު ބަތަލާގެ ރޯލުން ފެންނާނީ ދިވްޔާ ކޯސްލާ ކުމާރް އެވެ. މިއީ ދިގު މުއްދަތަކަށްފަހު ބޮލީވުޑް ފިލްމަކުން އޭނާ ފެންނަ ފިލްމެވެ. މި ފިލްމުގައި ޖޯން ދެ ރޯލެއް ކުޅޭނެ އެވެ.
ފިލްމުގެ އިތުރު ކާސްޓުންގެ ތެރޭގައި މަނޯޖް ބާޖްޕާއީ، އަމީރް ދަސްތޫރު، ގޯތަމީ ކަޕޫރު، ޝާދް ރާންދަވާ، ސާހިލް ވައިދްގެ އިތުރުން އަނޫޕް ސޯނީ ހިމެނެ އެވެ.
