ބޮލީވުޑްގެ މަޝްހޫރު ބަތަލާ އަދި އިންޑިއާގެ ޕޮލިޓީޝަން ޖަޔާ ބައްޗަން ވެބް ސީރީޒްއެއްގެ މަސައްކަތް ފަށައިފި އެވެ.
ބޮލީވުޑް ހަބަރުތައް ގެނަސްދޭ މީޑިއާ ރިޕޯޓުތައް ބުނާ ގޮތުން ޖަޔާ ފުރަތަމަ ފަހަރަށް ޑިޖިޓަލް މަސައްކަތަކުން ފެނިގެން ދާނީ "ސަދަބާރް" އިންނެވެ. މިއީ ގާތްގަނޑަކަށް 5 އަހަރަށްފަހު ބޮލީވުޑް މަސައްކަތެއް ޖަޔާ ކުރާ ފުރަތަމަ ފަހަރެވެ.
މި ސީރީޒްގެ މަސައްކަތް ޖަޔާ މިދިޔަ ފެބުރުއަރީ މަހު ފެށި އެވެ. އެހެންނަމަވެސް ކޮވިޑް-19 ގެ ސަބަބުން މުމްބާއީ ލޮކްޑައުން ކުރުމާއި ގުޅިގެން ޝޫޓިން މެދުކަނޑާލި އެވެ. މިހާރު އަނެއްކާވެސް ޝޫޓިން ވަނީ ފަށައިފަ އެވެ.
ސީރީޒްގެ ޝޫޓިންތައް މުމްބާއީގައި ފެށިއިރު އެސިޓީގައި ވަނީ ރައްކާތެރިކަމުގެ ފިޔަވަޅުތަކެއް އަޅައިފަ އެވެ. އެހެންކަމުން ޝޫޓިންތައް ކުރިއަށް ގެންދަނީ 50 ކްރޫ މެމްބަރުންނަށްވުރެއް އިތުރު ނުވާނޭ ހެންނެވެ. އަދި ކެމެރާ ކުރިމަތިން ފެންނަ ތަރިން ފިޔަވައި ކްރޫގެ އެހެން މެމްބަރުން ތިބެން ޖެހެނީ މާސްކު އަޅައިގެންނެވެ.
ޖަޔާ އެންމެ ފަހުން ބޮލީވުޑް މަސައްކަތަކުން ފެނުނީ 2016 ވަނަ އަހަރު "ކީ އެންޑް ކާ" ގެ ހާއްސަ ފެނިލުމަކުންނެވެ.
އަމީތާބު ބައްޗަން އާއި ކައިވެނީގެ ގޮތުން ގުޅިގެން އުޅޭ ޖަޔާ މިހާރު ބޮޑަށް ހަރަކާތްތެރިވަނީ ސިޔާސީ ދާއިރާގަ އެވެ. އެގޮތުން ޖަޔާއަކީ ސަމަޖްވާދީ ޕާޓީގެ މެމްބަރެކެވެ. 2004 ވަަނަ އަހަރުން ފެށިގެން ރަޖްޔާ ސަބާގެ މަޖިލިސް މެމްބަރެއްގެ ގޮތުގައި އޭނާ މަސައްކަތް ކުރަމުން ދާއިރު މިހާތަނަށް އޭނާ ވަނީ މެމްބަރެއްގެ ގޮތުގައި 4 ދައުރު ފުރިހަމަ ކޮށްފަ އެވެ.
