މަޝްހޫރު ވީޑިއޯ އެޕްލިކޭޝަން ޓިކްޓޮކް އަށް މިދިޔަ 2020 ވަނަ އަހަރު ބޮޑު އާމްދަނީއެއް ލިބިއްޖެ އެވެ.
ޓިކްޓޮކް ހިންގަނީ ޗައިނާގެ ބައިޓްޑާންސް ކުންފުނިންނެވެ. އެކުންފުނިން ބުނި ގޮތުގައި މިދިޔަ 2020 ވަނަ އަހަރު އެކުންފުންޏަށް 34.3 ބިލިއަން އެމެރިކާ ޑޮލަރު އާމްދަނީގެ ގޮތުގައި ލިބުނެވެ. މިއީ އޭގެ ކުރިން 2019 ވަނަ އަހަރާ އަޅާ ބަލާއިރު 111 އިންސައްތައިގެ ކުރިއެރުމެކެވެ.
ފައިދާގެ ގޮތުގައި ޓިކްޓޮކްއިން ލިބުނީ 19 ބިލިއަން ޑޮލަރެވެ. މިއީ 93 އިންސައްތައިގެ ކުރިއެރުމެކެވެ.
މިދިޔަ އަހަރުގެ އަހަރީ ރިޕޯޓު ދައްކާ ގޮތުން ޑިސެމްބަރު މަހާއި ހަމައަށް އެވަރޭޖްކޮށް މަހަކު 1.9 ބިލިއަން މީހުން ޓިކްޓޮކް ބޭނުން ކުރި އެވެ.
ޓިކްޓޮކް އެޕްލިކޭޝަން ބައެއް ގައުމުތަކުގައި މީގެ ކުރިން ބޭން ކުރި އެވެ. އެގޮތުން އެންމެ އާބާދީ ބޮޑު އަދި އެންމެ ބޮޑު ފޭން ބޭސްއެއްވެސް އޮތް އިންޑިއާގައި ޓިކްޓޮކް ވަނީ ބޭންކޮށްފަ އެވެ. މީގެ އިތުރުން އެމެރިކާގެ ކުރީ ސަރުކާރުންވެސް ޓިކްޓޮކް ބޭން ކުރި އެވެ.
ރާއީސް ޖޯ ބައިޑެން ވެރިކަމާއި ހަވާލުވެވަޑައިގެންނެވުމަށްފަހު އަނެއްކާވެސް ޓިކްޓޮކް ބޭނުންކުރަން އެމެރިކާގައި ހުއްދަ ދިނެވެ. އެހެންނަމަވެސް ބޭނުންކުރާ މީހުންގެ ޑޭޓާ އިތުރަށް ރައްކާކުރަން އެމެރިކާ ސަރުކާރުން ޓިކްޓޮކްގައި ވަނީ އެދިފަ އެވެ. ރައްކާތެރިކަމުގެ ގޮތުން ކަންކަން އިތުރަށް ވަރުގަދަ ނުކޮށްފިނަމަ އަނެއްކާވެސް އެމެރިކާގައި ޓިކްޓޮކް ބޭން ކޮށްފާނެ އެވެ.
މީގެ އިތުރުން ޗައިނާ ސަރުކާރުންވެސް ބައިޓްޑާންސް ކުންފުންޏަށް ވަނީ ޕްރެޝަރުތަކެއް ކުރިމަތިވެފަ އެވެ. އެގޮތުން ޓިކްޓޮކްއާއި ގުޅިގެން ގިނަ ކަންތައްތަކެއް ރަނގަޅުކުރަން ޗައިނާ ސަރުކާރުންވެސް ވަނީ އަންގައިފަ އެވެ.
