މިއަހަރުގެ މިހާތަނަށް ރާއްޖެއަށް ޒިޔާރާތްކުރި ފަތުރުވެރިންގެ އަދަދު ބައި މިލިއަނަށްވުރެއް މައްޗަށް ގޮސްފައިވާކަމަށް ޓޫރިޒަމް މިނިސްޓްރީގެ ތަފާސް ހިސާބުތަކުން ދައްކައިފި އެވެ.
މިނިސްޓްރީން އާންމުކުރި ތަފާސް ހިސާބުތައް ދައްކާ ގޮތުން އިއްޔެއާއި ހަމައަށް ރާއްޖެ އައި ފަތުރުވެރިންގެ އަދަދަކީ 500،406 އެވެ.
އެގޮތުން އެންމެ ގިނަ ފަތުރުވެރިން ރާއްޖެ ޒިޔާރާތްކުރީ މިދިޔަ މާޗު މަހު އެވެ. އޭގެ ފަހުން ފަތުރުވެރިން އަންނަ އަދަދު ވަނީ މަދުވެފަ އެވެ. މިދުވަސްވަރަކީ އޮފް ސީޒަނަށް ވެފައި ރާއްޖޭގެ ޓޫރިޒަމްގެ އެންމެ ބޮޑު އެއް މާކެޓު އިންޑިއާ އިން ފަތުރުވެރިން އައުން މިވަގުތަށް މަޑުޖައްސާލާފައިވުމަކީ ފަތުރުވެރިން މަދުވުމުގެ ސަބަބުތަކެވެ.
މީގެ އިތުރުން ކޮވިޑް-19 ގެ ބަލިމަޑުކަން ރާއްޖޭގައި އާންމުވެފައިވާތީ ބައެއް ބޮޑެތި މާކެޓުތައް އޮންނަ ގައުމުތަކުގައި ޓްރެވަލް އެޑްވައިޒަރީ ނެރެފައި އޮތުމަކީވެސް ފަތުރުވެރިން އައުން މަދުވުމުގެ ސަބަބެކެވެ.
ފަތުރުވެރިންގެ ތެރެއިން އެންމެ ގިނަ މީހުން ނިސްބަތްވަނީ ރަޝިޔާއިންނެވެ. އެއީ 120،514 މީހުންނެވެ. އޭގެ އިތުރުން އިންޑިއާ، ޖަރުމަނު، ޔޫކްރެއިންގެ އިތުރުން އެމެރިކާއިންވެސް ރާއްޖެއަށް ގިނަ އަދަދެއްގެ ފަތުރުވެރިން އައެވެ.
ރާއްޖޭގައި މިވަގުތު ޓޫރިސްޓުންނަށް ހިދުމަތްދޭ 731 ފެސިލިޓީ އޮތްއިރު އެތަންތަނުގައި 47،482 އެނދު އެބަ ހުއްޓެވެ.
