ފާއިތުވި ޖޫން މަހު ރާއްޖެއަށް އިމްޕޯޓް ކުރެވުނު މުދަލުގެ އަގު 2020 ވަނަ އަހަރުގެ ޖޫން މަހާ އަޅާބަލާއިރު 44 އިންސައްތަ ވަނީ އިތުރުވެފައި ކަމަށް މޯލްޑިވްސް ކަސްޓަމްސް ސާވިސްއިން ހާމަކޮށްފިއެވެ.
2021 ވަނަ އަހަރުގެ ޖޫން މަހުގެ ތަފާސް ހިސާބުތައް ދައްކާގޮތުން ނިމުނުމަހު އެކްސްޕޯޓް ކުރެވުނު މުދަލުގެ އަގު ވަނީ 3 އިންސައްތަ އިތުރުވެފައެވެ. ޖޫން މަހު ރާއްޖެއަށް 2.1 ބިލިއަން ރުފިޔާގެ މުދާ އިމްޕޯޓްކޮށްފައިވާއިރު މިއަހަރުގެ ޖޫން މަހު މިއަދަދު ވަނީ 3 ބިލިއަން ރުފިޔާއަށް އިތުރުވެފައި ކަމަށްވެސް ކަސްޓަމްސްއިން ހާމަކުރެއެވެ.
މީގެ އިތުރުން ފާއިތުވި ޖޫންމަހު ދައުލަތަށް ލިބުނު އާމްދަނީ 2020 ވަނަ އަހަރުގެ ޖޫން މަހާއި އަޅާ ބަލާއިރު 59 އިންސައްތަ ވަނީ އިތުރުވެފައެވެ. މިދިޔަ އަހަރުގެ ޖޫން މަހު 156 މިލިއަން ރުފިޔާ ދައުލަތަށް ލިބުނުއިރު، މިއަހަރުގެ ޖޫން މަހު މި އަދަދު ވަނީ 247 މިލިއަން ރުފިޔާއަށް އިތުރުވެފައެވެ.
