ނިމުނު ޖުލައި މަހު ރާއްޖެއަށް އިމްޕޯޓްކުރި މުދަލުގެ އަގު 48 އިންސައްތަ އިތުރު ކަމަށް ކަސްޓަމްސްގެ ތަފާސް ހިސާބުތަކުން ދައްކައިފިއެވެ.
2020 ވަނަ އަހަރުގެ ޖުލައި މަހު ރާއްޖެއަށް 1.9 ބިލިއަން ރުފިޔާގެ މުދާ އިމްޕޯޓްކޮށްފައިވާއިރު މިއަހަރުގެ ޖުލައި މަހު މި އަދަދު ވަނީ 2.8 ބިލިއަން ރުފިޔާއަށް އިތުރުވެފައެވެ. މީގެ އިތުރުން ޖުލައި މަހު ރާއްޖެއަށް ލިބުނު އާއްމދަނީ 2020 ވަނަ އަހަރުގެ ޖުލައި މަހާ އަޅާ ބަލާއިރު 17 އިންސައްތަ ވަނީ ދަށްވެފައެވެ. 2020 ވަނަ އަހަރުގެ ޖުލައި މަހު 239 މިލިއަން ރުފިޔާ ދައުލަތަށް ލިބިފައިވާއިރު މިއަހަރުގެ ޖުލައި މަހު މިއަދަދު ވަނީ 242 މިލިއަން ރުފިޔާ ދަށްވެފައި ކަމަށް ކަސްޓަމްސްގެ ތަފާސް ހިސާބުތަކުން ދައްކައެވެ.
ކަސްޓަމްސްގެ ތަފާސްހިސާބުތައް ދައްކާގޮތުން ޖުލައިމަހު ރާއްޖެއިން އެކްސްޕޯޓްކުރި މުދަލުގެ އަދަދު ވަނީ %8 އިތުރުވެފައެވެ. 2020ވަނަ އަހަރުގެ ޖުލައި މަހު ރާއްޖެއިން އެކްސްޕޯޓްކޮށްފައިވަނީ 203 މިލިއަން ރުފިޔާގެ މުދަލެވެ. ނަމަވެސް މި އަހަރުގެ ޖުލައިމަހު މިއަދަދު ވަނީ 219 މިލިއަނަށް އަރާފައެވެ.
ޖުލައި މަހު ރާއްޖެއަށް އެންމެ ގިނަ މުދާ އެތެރެކޮށްފައިވަނީ ޗައިނާ، ސިންގަޕޫރު އަދި އިންޑިއާއިންނެވެ. ޗައިނާއިން 434 މިލިއަން ރުފިޔާގެ މުދާ އެތެރެކޮށްފައިވާއިރު ސިންގަޕޫރުން ވަނީ 348 މިލިއަން ރުފިޔާގެ މުދާ ރާއްޖެއަށް އެތެރެ ކޮށްފައެވެ. އަދި އިންޑިއާއިން ވަނީ 330 މިލިއަން ރުފިޔާގެ މުދާ ފާއިތުވި މަހު ރާއްޖެއަށް އެތެރެކޮށްފައެވެ.
