ސެޕްޓެމްބަރު މަހު ރާއްޖެއަށް އިމްޕޯޓްކުރި މުދަލުގެ އަގު 90 އިންސައްތަ އިތުރު ކަމަށް ކަސްޓަމްސްގެ ތަފާސް ހިސާބުތަކުން ދައްކައިފިއެވެ.
2020 ވަނަ އަހަރުގެ ސެޕްޓެމްބަރު މަހު ރާއްޖެއަށް 1.9 ބިލިއަން ރުފިޔާގެ މުދާ އިމްޕޯޓްކޮށްފައިވާއިރު މިއަހަރުގެ ސެޕްޓެމްބަރު މަހު މި އަދަދު ވަނީ 3.6 ބިލިއަން ރުފިޔާއަށް އިތުރުވެފައެވެ. މީގެ އިތުރުން ސެޕްޓެމްބަރު މަހު ރާއްޖެއަށް ލިބުނު އާއްމުދަނީ 2020 ވަނަ އަހަރުގެ ސެޕްޓެމްބަރު މަހާ އަޅާ ބަލާއިރު 137 އިންސައްތަ ވަނީ އިތުރުވެފައެވެ. 2020 ވަނަ އަހަރުގެ ސެޕްޓެމްބަރު މަހު 119 މިލިއަން ރުފިޔާ ދައުލަތަށް ލިބިފައިވާއިރު މިއަހަރުގެ ސެޕްޓެމްބަރު މަހު މިއަދަދު ވަނީ 281 މިލިއަން ރުފިޔާ ދަށްވެފައި ކަމަށް ކަސްޓަމްސްގެ ތަފާސް ހިސާބުތަކުން ދައްކައެވެ.
ކަސްޓަމްސްގެ ތަފާސްހިސާބުތައް ދައްކާގޮތުން ސެޕްޓެމްބަރުމަހު ރާއްޖެއިން އެކްސްޕޯޓްކުރި މުދަލުގެ އަދަދު ވަނީ 13 އިންސައްތަ ދަށްވެފައެވެ.
ޖުލައި މަހު ރާއްޖެއަށް އެންމެ ގިނަ މުދާ އެތެރެކޮށްފައިވަނީ އޮމާން، ޗައިނާ، ޔޫއޭއީ އަދި އިންޑިއާއިންނެވެ. އޮމާންއިން 603 މިލިއަން ރުފިޔާގެ މުދާ އެތެރެކޮށްފައި ވާއިރު ޗައިނާއިން 441 މިލިއަން ރުފިއާ ވަނީ އެތެރެކޮށްފައެވެ. އިންޑިއާއިން 434 މިލިއަން ރުފިޔާގެ މުދާ އެތެރެކޮށްފައިވާއިރު ޔޫއޭއިން ވަނީ 418 މިލިއަން ރުފިޔާގެ މުދާ ރާއްޖެއަށް އެތެރެ ކޮށްފައެވެ.
