ސެމްސަންގް ގެ އާ ސްމާޓްވޮޗް މިމަހު 28 ގައި ލޯންޗް ކޮށްފާނެ

ސައުތު ކޮރިއާގެ މަގްބޫލު ޓެކް ކުންފުނި ސެމްސަންގުގެ އާ ސްމާޓްވޮޗް މިމަހު 28 ގައި ލޯންޗް ކޮށްފާނެ ކަމަށް ރިޕޯޓުތައް ބުނެފި އެވެ.
މިމަހުގެ 28 ވަނަ ދުވަހު ސެމްސަންގް އިން ވަނީ މޯބައިލް ވޯލްޑް ކޮންގްރެސް (އެމްޑަބްލިއުސީ) ގެ މިއަހަރުގެ ރަސްމިއްޔާތު ބާއްވަން ތާވަލުކޮށްފަ އެވެ. މި ރަސްމިއްޔާތު މިއަހަރު އޮންނާނީ ބާސެލޯނާގަ އެވެ. ރަސްމީކޮށް އިއުލާން ނުކުރިނަމަވެސް ސެމްސަންގް ގެ ގެލެކްސީ ވޮޗް ގެ ހަތަރުވަނަ ސީރީޒް މި ރަސްމިއްޔާތުގައި ލޯންޗް ކުރާނެ ކަމަށް އޮތީ ބެލެވިފަ އެވެ.
ސެމްސަންގް އިން އާ ގަޑި އުފައްދަނީ ގޫގުލްއާއިއެކު ހަދާފައިވާ ޕާޓްނާޝިޕެއްގެ ދަށުންނެވެ. އެހެންކަމުން މި ސްމާޓްވޮޗް ގައި އާ ފީޗާތަކެއް ހިމެނޭނެކަމަށް އޮތީ ބެލެވިފަ އެވެ.
މިމަހު 28 ވަނަ ދުވަހު އޮންނަ ރަސްމިއްޔާތުގައި ތާވަލުކޮށްފައިވާ ކަންކަން އެމްޑަބްލިއުސީ ވެބްސައިޓުގައި މިހާރު އާންމު ކޮށްފައިވާއިރު އޭގެ ތެރޭގައި "ގެލެކްސީ އީކޯ ސިސްޓަމް" އާއި "އާ ގަޑީގެ ތަޖުރިބާ" ވަނީ ހިމަނައިފަ އެވެ. އަދި ސެމްސަންގުން ވަނީ ސްމާޓްވޮޗްގެ މަންޒަރު އަލުން ކުރަހަން މަސައްކަތް ފަށާފައިވާކަމަށް ބުނެފަ އެވެ.
އެމްޑަބްލިއުސީ އަކީ ގޫގުލް އާއި ސެމްސަންގް ގުޅިގެން ކޮންމެ އަހަރަކުވެސް ބާއްވަމުން އަންނަ ރަސްމިއްޔާތެކެވެ. މި ރަސްމިއްޔާތުގައި ކިޔައިދެނީ ސެމްސަންގް އާއި ގޫގުލްގެ އާ އީޖާދު ތަކުގެ ވާހަކަ އެވެ. އަދި ސްމާޓް ދިރިއުޅުމަށް ކުރަމުންދާ މަސައްކަތްތަކުގެ ވާހަކަވެސް ރަސްމިއްޔާތުގައި ކިޔައިދެ އެވެ.
މިއަހަރުގެ ހަރަކާތް ބާސެލޯނާގައި ބާއްވާއިރު ރަސްމިއްޔާތު އޮންނާނީ އޮންލައިންކޮށެވެ. ފިޒިކަލީ އެއްވެސް މީހަކަށް ބައިވެރި ނުވެވޭގޮތަށް ނިންމީ ކޮވިޑް-19 ގެ ސަބަބުން ދެ ކުންފުނީގެ ސްޓާފުންގެ ސިއްހަތަށް ރިއާޔަތް ކޮށެވެ.