ދާދި ފަހުން އިއުލާން ކުރި ކަރަން ޖޯހަރުގެ ފިލްމު "ރޮކީ އޯރް ރާނީ ކީ ޕްރޭމް ކަހާނީ" ގެ ޝޫޓިން ލޮކޭޝަންތައް ހޯދުމުގެ މަސައްކަތް ފަށައިފި އެވެ.
މިމަހުގެ ނުވަ ވަނަ ދުވަހު ފިލްމުގެ ލީޑް އެކްޓަރު ރަންވީރް ސިންގް ގެ އުފަންދުވަހާއި ދިމާކޮށް އިއުލާންކުރި މި ފިލްމުގެ ބަތަލާގެ ރޯލުން ފެންނާނީ އާލިއާ ބަޓް އެވެ. މުހިންމު ރޯލުތަކުން ޖަޔާ ބައްޗަން، ޝަބާނާ އާޒްމީގެ އިތުރުން ދަރްމޭންދްރަވެސް ފެންނާނެ އެވެ.
ކަރަން ވަނީ އޭނާގެ އިންސްޓަގްރާމުގައި ފިލްމުގެ ޝޫޓިންއަށް ލޮކޭޝަންތައް ބަލަމުން ދާކަން އިއްޔެ އިއުލާން ކޮށްފަ އެވެ.
ލޯބީގެ ފިލްމުތައް ޑައިރެކްޓު ކުރަން މަޝްހޫރު ކަރަން އެންމެ ފަހުން ފިލްމެއް ޑައިރެކްޓު ކުރީ 2016 ވަނަ އަހަރު އެވެ. އެއީ ރަންބީރު ކަޕޫރު އަދި އަނުޝްކާ ޝަރްމާ ލީޑް ރޯލުން ފެނިގެންދިޔަ "އޭ ދިލް ހެ މުޝްކިލް" އެވެ. އެފިލްމުގައި މުހިންމު ރޯލުތަކުން އައިޝްވާރިޔާ ރާއީގެ އިތުރުން ފަވާދު ހާންވެސް ފެނުނެވެ.
"ރޮކީ އޯރް ރާނީ ކީ ޕްރޭމް ކަހާނީ" އަކީވެސް ލޯބީގެ ފިލްމެކެވެ. މިއީ ރަންބީރު އަދި އާލިއާ "ގަލީ ބޯއީ" އަށްފަހު އެކީގައި ފެނިގެންދާ ފުރަތަމަ ފިލްމެވެ. މިދެތަރިންނަކީ މިވަގުތު ބޮލީވުޑްގައި ތިބި އެންމެ ޑިމާންޑު ބޮޑު ދެ ތަރިންކަންވެސް ފާހަގަކޮށްލެވެ އެވެ.
މީޑިއާ ރިޕޯޓުތައް ބުނާ ގޮތުން މިފިލްމުގެ ޝޫޓިންގް މިއަހަރު ތެރޭގައި ފަށާނެ އެވެ. ސީދާ ތާރީހެއް އިއުލާން ނުކުރި ނަމަވެސް ޝޫޓިންތައް ކުރިއަށް ގެންދާނެ ކަމަށް ބެލެވެނީ އިންޑިއާގެ އެކި ހިސާބުތަކުގަ އެވެ.
