ޕްރޮޑިއުސަރު އަދި ޑައިރެކްޓަރު ކަރަން ޖޯހަރުގެ ކުރިއަށް އޮތް ފިލްމުގައި ލީޑް ރޯލުން ފެންނާނީ އެކްޓަރު ރަންވީރް ސިންގް އާއި ބަތަލާ އާލިއާ ބަޓް ކަން އިއުލާން ކޮށްފި އެވެ.
މިއަދު އިއުލާން ކުރި "ރޮކީ އޯރް ރާނީ ކީ ޕްރޭމް ކަހާނީ" އަކީ ފިލްމު "އޭ ދިލް ހެ މުޝްކިލް" އަށްފަހު ކަރަން ޑައިރެކްޓު ކުރާ ފުރަތަަމަ ފިލްމެކެވެ. ކަރަން އަކީ ލޯބީގެ ފިލްމުތައް ޑައިރެކްޓު ކުރުމަށް މަޝްހޫރު ފަރާތެކެވެ. މިފަހަރުގެ ފިލްމަކީވެސް ލޯބީގެ ފިލްމެކެވެ.
މީގެ ކުރިން އޮސްކާއަށް ނޮމިނޭޓުވި ފިލްމު "ގަލީ ބޯއީ" ގައި އެއްކޮށް ފެނިގެން ދިޔަ ރަންވީރް އާއި އާލިއާ ސްކްރީނުން އެކީގައި ފެންނާނެ މިއީ ދެވަނަ ފަހަރެވެ. މިފިލްމުގައި ރަންވީރު އަދާކުރާނީ ރޮކީގެ ރޯލެވެ. އަދި ރާނީގެ ރޯލު ކުޅޭނީ އާލިއާ އެވެ.
ފިލްމުގެ މާ ގިނަ ތަފްސީލެއް މިހާތަނަށް ހާމަކޮށްފައި ނުވިނަމަވެސް ރިޕޯޓުތައް ބުނާ ގޮތުން ކުރީގެ މަޝްހޫރު ދެ އެކްޓަރުން ކަމަށްވާ ޝަބާނާ އާއި ދަރްމޭންދުރަވެސް މިފިލްމުގައި ފެންނާނެ އެވެ. މިއީ މިދެތަރިން އެކީގައި ފެނިގެންދާ ދެވަނަ ފަހަރެވެ. މިދެތަރިން ކުޅޭނީ އާއިލާގެ މާމައާއި ކާފަގެ ރޯލު ކަމަށް ރިޕޯޓުތައް ބުނެ އެވެ.
މީގެ އިތުރުން ކަރަންގެ "ކަބި ހުޝީ ކަބީ ގަމް" އަދި "ކަލް ހޯ ނަ ހޯ" ގައި ފެނުނު ކުރީގެ ބަތަލާ ޖަޔާ ބައްޗަން މި ފިލްމުގައި ފެންނާނީ ރަންވީރުގެ މާމަގެ ރޯލުން ކަމަށްވެސް ރިޕޯޓުތައް ބުނެ އެވެ.
Thrilled to get behind the lens with my favourite people in front of it! Presenting Rocky Aur Rani Ki Prem Kahani, headlined by none other than Ranveer Singh and Alia Bhatt and written by Ishita Moitra, Shashank Khaitan & Sumit Roy. pic.twitter.com/vZzGbvv6nS
— Karan Johar (@karanjohar) July 6, 2021
"އޭ ދިލް ހެ މުޝްކިލް" އަށްފަހު ކަރަންގެ ޑައިރެކްޝަންއެއް މި އަަހަރު ފެންނާނެ ކަމަށް ކުރިން އޮތީ ބެލެވިފަ އެވެ. އެއީ ރަންވީރުގެ އިތުރުން އާލިއާ އާއި ވިކީ ކައުޝާލްގެ އިތުރުން ކަރީނާ ކަޕޫރު ހާންއާއި އެހެންވެސް ބައެއް މަޝްހޫރު ތަރިންނާއިއެކު ޕީރިއަޑް ފިލްމު "ތަހްތު" އެވެ. އެ ފިލްމުގެ މަސައްކަތް ފަސްކުރީ ކޮވިޑް-19 ގެ ސަބަބުންނެވެ. މިހާރު އިއުލާންވެސް ކޮށްފައިވާ އެ ފިލްމުގެ މަސައްކަތް އަލުން ފަށާނެ ކަމަށް ބެލެވެނީ ބަތަލާ ކަރީނާ ކަޕޫރު ފޯމަކަށް އެޅުމުން ކަމަށް ބެލެވެ އެވެ. ދެވަނަ ދަރިފުޅު ވިހެއުމަށްފަހު ކަރީނާ ދަނީ އަލުން ސްކްރީނަށް އައުމަށް ހަށިގަނޑު ބައްޓަން ކުރުމުގެ މަސައްކަތް ކުރަމުންނެވެ.
ފިލްމު "ކުޗް ކުޗް ހޯތާ ހޭ" އިން ޑައިރެކްޝަންގެ ތެރެއަށް ނިކުތް ކަރަންގެ ގިނަ ފިލްމުތަކަކީ ބޮކްސް އޮފީސް ބްލޮކްބަސްޓާ އެވެ. އޭނާ ޑައިރެކްޓު ކުރި ފިލްމުތަކުގެ ތެރެއިން ފްލޮޕްވީ އެންމެ ފިލްމެކެވެ. އެއީ 2013 ވަނަ އަހަރު ނިކުތް "ބޮމްބޭ ޓޯކީސް" އެވެ. އެފިލްމުގެ ހަތަރު ސެގްމެންޓު ހަތަރު މީހުން ޑައިރެކްޓު ކުރި އިރު ކަރަން ޑައިރެކްޓު ކުރީ "އަޖީބް ދާސްތާން ހެ ޔޭ" ސެގްމެންޓެވެ.
