ރާއްޖެ-ލަންކާ މެޗްގެ އިތުރު 1000 ޓިކެޓް މިރޭ ވިއްކާނެ ކަމަށް އެފްއޭއެމުން ހާމަކޮށްފިއެވެ.
ފުޓްބޯލް އެސޯސިއޭޝަން އޮފް މޯލްޑިވްސް އިން ނެރުނު ބަޔާނެއްގައި ބުނެފައިވަނީ، ދިވެހިރާއްޖޭގައި މިމަހުގެ 1 އިން 16 އަށް ކުރިއަށްދާ ސާފު ޗެމްޕިއަންޝިޕް ފުޓްބޯޅަ މުބާރާތުގައި މާދަމާ ހަވީރު ބައްދަލުކުރާ ދެ ގައުމަކީ ދިވެހިރާއްޖެ އާއި ސްރީލަންކާ ކަމަށެވެ.
މިމެޗްގެ ބެލުމަށް ކުޅުންތެރިންގެ އާއިލާ އާއި އެފްއޭއެމްގެ ސްޕންސަރުންނާއި ފުޓްބޯޅަ ކުލަބުތަކަށް ވިއްކުމަށް ހަމަޖައްސާފައިވާ 2500 ޓިކެޓްގެ އިތުރުން ކުޅިބެލުންތެރިންނަށް ވިއްކުމަށް ހަމަޖައްސާފައިވާ ހުރިހާ ޓިކެޓެއް މިހާރު ވަނީ ވިކި ހުސްވެފައި ކަމަށް އެފްއޭއެމުން ހާމަކުރެއެވެ.
ނަމަވެސް ދިވެހިރާއްޖެ ކުޅޭ މި މެޗް ބެލުމަށް ދަނޑަށް ވަނުމަށް ގިނަ އަދަދެއްގެ ބަޔަކު އެދެމުންދާތީވެ އެކަމަށް ހައްލެއް ހޯދައިދިނުމަށް އެފްއޭއެމުން ވަނީ ނިންމާފައި ކަމަށެވެ. މިގޮތުން ސްޕޮންސަރުންނާއި ކްލަބްތަކަށް އަދި ކުޅުންތެރިންގެ އާއިލާތަކަށް ވިއްކުމަށް ހަމަޖެހިފައިވާ ޓިކެޓްތަކުގެ ތެރެއިން އިތުރު 1000 ޓިކެޓް ސަޕޯޓަރުން ނަށް ވިއްކުމަށް މިހާރުވަނީ ނިންމާފައެވެ. މި 1000 ޓިކެޓް ވިއްކަން ފަށާނީ މީހަކަށް ޓިކެޓެއްގެ މަގުން މިރޭ 20:00 ގައި ސޯޝަލް ސެންޓަރުގައި ކަމަށް އެފްއޭއެމުން ހާމަކުރެއެވެ.
