ދިވެހިރާއްޖޭގެ ތަފާސްހިސާބުގެ ބިލު ގައިވާގޮތުގެ މަތީން ޗީފް ސްޓެޓިސްޓީޝަންގެ މަގާމަށް ކުރިމަތިލުމުގެ ފުރުސަތު، ރައީސުލްޖުމްހޫރިއްޔާގެ އޮފީހުން މިއަދު ހުޅުވާލައިފިއެވެ.
އެގޮތުން ޗީފް ސްޓެޓިސްޓީޝަންގެ މަގާމަށް އެދި ހުށަހަޅާ ފޯމު ބަލައިގަތުމަށް ހަމަޖެހިފައިވަނީ، އޮގަސްޓު 10 އަދި 11 ވަނަ ދުވަހު ހެނދުނު 10:00 އިން މެންދުރު 12:30 އަށް ރައީސުލްޖުމްހޫރިއްޔާގެ އޮފީހުންނެވެ.
މި މަގާމަށް ކުރިމަތިލުމަށް އެދޭ ފޯމު ރައީސުލްޖުމްހޫރިއްޔާގެ އޮފީހުން ލިބެން ހުންނާނެ ކަމަށް އެ އޮފީހުން މައުލޫމާތުދެއެވެ.
މީގެ އިތުރުން ދިވެހިރާއްޖޭގެ ތަފާސްހިސާބުގެ ގާނޫނުއަށް އަމަލުކުރަން ފެށުމާއެކު، އެ ގާނޫނުގެ 3 ވަނަ މާއްދާގެ (ހ) ދަށުން އުފެދިފައިވާ "މޯލްޑިވްސް ބިއުރޯ އޮފް ސްޓެޓިސްޓިކްސް" އަކީ، ޖުލައި 20 ވަނަ ދުވަހުން ފެށިގެން، މިނިސްޓްރީ އޮފް ނޭޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރގެ ދަށުން ހިންގަމުންގެންދާ އިދާރާއެއްގެ ގޮތުގައި ވަނީ ހަމަޖައްސާފައެވެ. އަދި އެހައިތަނަށް އެ މިނިސްޓްރީގެ ދަށުން ހިނގަމުންއައި "ނޭޝަނަލް ބިއުރޯ އޮފް ސްޓެޓިސްޓިކްސް"، އެ ތާރީހުން ފެށިގެން އުވައިލާފައިފި ކަމަށްވެސް ރައީސް އޮފީހުން ހާމަކުރެއެވެ.
