ރާއްޖޭގެ އާބާދީގެ 69 އިންސައްތަ މީހުން ވެކްސިންގެ ދެ ޑޯޒް ފުރިހަމަކޮށްފައިވާ ކަމަށް ރައީސުލްޖުމުހޫރިއްޔާ ވިދާޅުވެއްޖެއެވެ.
ރައީސް އިބްރާހިމް މުހައްމަދު ސާލިހް ވިދާޅުވީ، މިއަދާ ހިސާބަށް އައިއިރު، މުޅި އާބާދީގެ 80 ޕަސެންޓް މީހުން ފުރަތަމަ ޑޯޒް ޖަހައި ނިންމާފައިވާ ކަމަށެވެ. މާލެއަށް އެކަނި ބަލާއިރު، މާލޭގައި ވެކްސިންޖަހާ އާބާދީ ކަމުގައިވާ 181،000 މީހުންގެ ތެރެއިން 82 ޕަސެންޓް، ފުރަތަމަ ޑޯޒް ޖަހައިފައިވާއިރު 70 ޕަސެންޓް މީހުން ދެވަނަ ޑޯޒް ޖަހައިފިއެވެ.
މިވަގުތު އެންމެބޮޑު އެއް އަމާޒަކީ، ރާއްޖޭގައި ވެކްސިންޖެހޭ އާބާދީއަށް ބޭނުންވާ މިންވަރަށް ވެކްސިން ހޯދައި، ހުރިހާ އެންމެންނަށް ވެކްސިން ފުރިހަމަކޮށްދިނުން. ކަމަށް ރައީސް ވިދާޅުވިއެވެ. އަދި ދުނިޔޭގެ ސިއްހީ ތަޖުރިބާކާރުން އިއްތިފާގުވާ ގޮތުގައި، ކޮވިޑުގެ ބަލިމަޑުކަމުން އަރައިގަތުމަށް ކުރެވެން އޮތް އެންމެ މުހިންމު ކަމަކީ، ވެކްސިންގެ ދެ ޑޯޒް އަވަހަށް ހަމަކުރުން. ކަމަށްވާއިރު ކުރި މަސައްކަތުން މިއަދު މިވަނީ ރާއްޖޭގައި ވެކްސިން ޖަހާ އާބާދީގެ، 12 އަހަރުން މަތީގެ، އެންމެންނަށް ވެކްސިން ޖެހޭވަރަށް ވެކްސިން ހޯދިފައިވާ ކަމަށް ރައީސް ވިދާޅުވިއެވެ.
12 އަހަރާއި 17 އަހަރާ ދެމެދުގެ ކުދިންނަށް މިހާރު ވެކްސިން ޖެހުމަށް ޑަބްލިޔޫ.އެޗް.އޯ. އިން ހުއްދަ ލިބިފައި އޮތީ އެންމެ ވެކްސިނެކެވެ. އެއީ "ފައިޒަރ" ވެކްސިނެވެ. ރައީސް ސާލިހު ވިދާޅުވީ، އަންނަ ހަފްތާ ފެށުމާ އެކީގައި، ރާއްޖޭގެ ސްކޫލްތަކުގައި އުޅޭ 12 އަހަރާއި 17 އަހަރުގެ ދަރިވަރުންނަށް، އަދި އެ އުމުރުފުރާގެ ހުރިހާ ކުދިންނަށް ވެކްސިން ޖެހުމުގެ ބޮޑު މަޝްރޫޢެއް ފަށާ އަމާޒަކީ، މި މަސް ނިމޭއިރަށް، ރާއްޖޭގައި ދިރިއުޅޭ ވެކްސިން ޖަހާ އާބާދީގެ 90 ޕަސެންޓަށް ވެކްސިން ޖެހުން ކަމަށް ރައީސް ވިދާޅުވިއެވެ.
