އެޑިއުކޭޝަނުން ދޫކޮށްފައިވާ ޓެބްލެޓްތައް ހަލާކުވުމުން އަލުން ހޯދުމުގައި ލުއި ގޮތްތަކެއް ހަމަޖައްސަވައިދެއްވަން ރައީސް އަރިހުގައި ތ. އަތޮޅު ތަޢުލީމީ މަރުކަޒުގެ ބެލެނިވެރިން އެދެފިއެވެ.
ރައީސުލްޖުމްހޫރިއްޔާ އިބްރާހީމް މުހައްމަދު ސާލިހް މިހާރު ތ. އަތޮޅަށް ކުރައްވަމުން ގެންދަވާ ދަތުރުފުޅުގައި ތ. އަތޮޅު ތަޢުލީމީ މަރުކަޒަށް ޒިޔާރަތްކުރައްވައި، ބޭއްވެވި ބައްދަލު ކުރެއްވުމުގައި ސުކޫލަށް ދިމާވާ އެކި ދަތިތައް ވަނީ ހިއްސާކޮށްފައެވެ.
މިގޮތުން ތައުލީމީ މަރުކަޒުގެ އިސްވެރިން ވަނީ ސްކޫލްގެ ޖާގައިގެ ދަތިކަން ޙައްލުކުރުމަށް އިތުރު 6 ކްލާސްރޫމް ތަރައްގީކުރަމުން އަންނަކަން ފާހަގަކުރައްވާފައެވެ. އަދި، ސްކޫލް ޒަމާނީ ފެންވަރަކަށް ތަރައްގީކުރުމަށް ބޭނުންވާ ރީސްޓްރަކްޗަރިން މަސައްކަތްތަކާއި، ބޭނުންވާ ވަސީލަތްތަކާއި، ސްކޫލް މަރާމާތަށް ބޭނުންވާ ބަޖެޓް އަދި، ފަންނީ މުވައްޒަފުން ހޯދުމުގައި ދިމާވާ ދަތިތައް ހާއްސަގޮތެއްގައި ވަނީ ފާހަގަކުރައްވާފައެވެ.
ރައީސުލްޖުމްހޫރިއްޔާ ވަނީ ތަޢުލީމީ މަރުކަޒުގެ އިސްވެރިން އަދި ބެލެނިވެރިން ފާހަގަކުރެއްވެވިި ކަންކަން ފަހިކުރުމުގައި ސަރުކާރުން ކުރެވެން ހުރި މަސައްކަތްތައް ކޮށްދެއްވާނެކަމުގައި ވިދާޅުވެފައެވެ.
މީގެ އިތުރުން ރައީސުލްޖުމްހޫރިއްޔާ ވަނީ ތިމަރަފުށީގެ ބޯހިޔާވަހިކަމަށް ޙައްލެއް ހޯދުމުގެ ގޮތުން އެރަށުގައި އަލަށް ޢިމާރާތްކުރާ 100 ހައުސިންގ ޔުނިޓްގެ މަސައްކަތް ކުރިޔަށްދާ ގޮތް ބައްލަވާލައްވާފައެެވެ. އެސް.ޖޭ ކޮންސްޓްރަކްޝަން ޕްރައިވެޓް ލިމިޓެޑާ ޙަވާލުކޮށްގެން ކުރިޔަށްގެންދާ މި މަޝްރޫޢަކީީ 71،510،250.00 ރުފިޔާގެ މަޝްރޫޢެކެވެ. އެއް އަހަރުދުވަހުގެ މުއްދަތެއް ތެރޭގައި ނިންމުމަށް ރާވާފައިވާ މި މަޝްރޫޢުގެ މަސައްކަތުގެ ބޮޑު ބައެއް މިހާރު ވަނީ ނިމިފައެވެ. މިގޮތުން 64 ގޭގެ ރޫފްބީމް މަސައްކަތާއި، ރޭނުމުގެ މަސައްކަތް ވަނީ ނިމިފައެވެ. އަދި، 42 ގޭގެ ސިމެންތި ޖެހުމުގެ މަސައްކަތާއި، 56 ގޭގެ ރޫފް ޓްރަސް ހަރުކުރުމާއި، 32 ގޭގެ ހިޔާކުރުމުގެ މަސައްކަތް ވަނީ ނިމިފައެވެ.
